Tóna­bíó opnar á ný

Þetta kemur fram í tilkynningu sem þeir í Rvk Brugghús og Tónabíó birtu í færslu á Facebook-síðu sinni núna í mars. Tónabíó var fyrst opnað þann 23. apríl árið 1962. 

Feðgarnir í Lumex, Helgi Kristinn Eiríksson og Ingi Már Helgason, keyptu húsnæðið árið 2022 og lofuðu þá að engin áform væru um að byggja hótel eða blokk í staðinn. Heldur mætti „með réttu samstarfsaðilunum og réttum hópi einstaklinga, gera Tónabæ, Tónabíó, Vinabæ, að skemmtilegum samkomustað“. 

„Húsið sem reis árið 1962 fyrir tónlist og kvikmyndir, lifði lengi sem samkomustaður borgarinnar og síðar sem Vinabær, fær nú nýtt líf sem viðburðarými þar sem Reykjavík kemur saman á ný,“ segir í tilkynningu á Facebook síðu Rvk Bruggfélags Tónabíó.

Það var reist af Tónlistarfélagi Reykjavíkur og þar starfaði svo Tónlistarskólinn í Reykjavík á efri hæðinni. Fyrsta kvik­myndin sem sýnd var í Tóna­bíói var Enginn er full­kominn (Some Like It Hot) með Mari­lyn Mon­roe, Tony Curtis og Jack Lemmon í aðal­hlut­verkum.

Þann 28. febrúar 2022 var bingó spilað í Vinabæ í allra síðasta sinn en fyrsta bingókvöldið var haldið 26. febrúar árið 1982, að vísu ekki í Vinabæ, og því er um að ræða tæplega fjögurra áratuga starfsemi.

Bingóunnendur þurfa þó ekki að óttast um of vegna þess að Helgi og Ingi útiloka alls ekki möguleikann á að seinna meir verði hægt að spila bingó í þessari miðstöð leiksins hér á landi.

Um helgina verður haldin opnunarhátið í nýja Tónabíói og þar munu stíga á stokk tónlistarmenn á borð við Amor Vincit Omnia, Hipsumhaps og digital ísland.