Hafa enn ekki unnið eftir að þeir fengu Russell Westbrook til sín

Westbrook samdi við Los Angeles Clippers á dögunum eftir að hann samdi sig út úr samningnum við Utah Jazz. Lakers sendi hann til Utah Jazz á lokadegi félagskiptagluggans en náði síðan samkomulagi um starfslok.

Clippers spilaði í nótt sinn þriðja leik með Westbrook innanborðs og úrslitin voru eins og í hinum tveimur eða tap.

Fyrstu tveir leikirnir töpuðust reyndar í framlengingu en leikurinn á móti Minnesota Timberwolves í nótt tapaðist með sjö stigum, 108-101.

Westbrook var í byrjunarliðinu og bauð upp á 14 stig, 10 stoðsendingar og 7 fráköst á 28 mínútum.

Hann er með 16,0 stig og 9,3 stoðsendingar að meðaltali í leik í Clippers búningnum en var með 15,9 stig og 7,5 stoðsendingar í leik í fyrstu 52 leikjunum með Lakers.