Óveidd loðna Norðmanna gæti jafnað skertan kvóta

Í fréttum Stöðvar 2 var bein útsending úr Hafnarfjarðarhöfn þar sem hafrannsóknaskipið Árni Friðriksson var að koma úr sex daga loðnuleiðangri á Vestfjarðamið. Rætt var við fiskifræðinginn Guðmund Óskarsson, sviðsstjóra uppsjávarsviðs hjá Hafrannsóknastofnun.

Loðnuveiðarnar hafa fram til þessa gengið framar vonum. Íslenski flotinn hefur síðustu daga verið að fylgja stórri loðnutorfu vestur með suðurströndinni. Torfan var í dag við Vestmannaeyjar, milli lands og Eyja.

Skipverjar á Hoffelli frá Fáskrúðsfirði mældu hrognaprósentu þar upp í átján prósent, samkvæmt upplýsingum frá Friðriki Mar Guðmundssyni, framkvæmdastjóra Loðnuvinnslunnar. Það þýðir að loðnan er orðin hæf í frystingu fyrir Japansmarkað og því orðin mun verðmætari.

Á vef Fiskistofu kemur fram að íslensku skipin voru í dag búin að veiða 331 þúsund tonn af 662 þúsund tonna útgefnum kvóta. Hafrannsóknastofnun varaði hins vegar við því í byrjun mánaðarins að skerða þyrfti heildarkvótann um 100 þúsund tonn ef ekki fyndist meiri loðna undan Vestfjörðum á svæði sem ekki tókst að kanna í síðustu loðnumælingu vegna hafíss.

Eftir að Árni Friðriksson var lagstur að bryggju í Hafnarfirði í kvöld var Guðmundur Óskarsson spurður hvort eitthvað hefði fundist að ráði af loðnu fyrir vestan og hvort stofnunin myndi leggja til 100 þúsund tonna niðurskurð aflaheimilda, en um 80 þúsund tonn myndu þá skerðast af kvóta Íslendinga.

„Nei, magnið var í raun óverulegt sem mældist, sem þýðir að það hefur ekki verið stór ganga að koma undan ísnum þarna fyrir vestan á þessum tíma frá því við vorum þarna síðast.“

-Þýðir þetta að þið munuð þá leggja til skerðingu á kvótanum?

„Það.. - óhjákvæmilega verður einhver skerðing. Ég get ekki sagt á þessum tímapunkti hvað hún verður mikil. En það verður einhver skerðing.“

-En ekki 100 þúsund tonn?

„Hún verður minna en 100 þúsund tonn, já.“

En það eru aðrar fréttir sem gætu glatt Íslendinga en ekki Norðmenn því það stefnir í að norski loðnuflotinn, sem má bara veiða við Ísland í eina viku til viðbótar, muni ekki ná að klára sinn kvóta. Talið er að norsku skipin eigi enn um 85 þúsund tonn óveidd og telja menn sem vel þekkja til ólíklegt að þau nái að veiða mikið meira en 30 þúsund tonn til viðbótar.

Þá gætu kannski 40-50 þúsund tonn fallið aukalega í hlut íslensku skipanna og þannig jafnvel farið langleiðina með að jafna út yfirvofandi niðurskurð, - og það á verðmætasta veiðitímanum framundan.

Hér má sjá útsendingu Stöðvar 2: