Ljónin til­­einkuðu fyrsta sigurinn fórnar­lömbum skot­á­rásarinnar í Ox­­ford

Tom Brady og Patrick Mahomes leiddu báðir lið sín til sigurs en á meðan Brady fór enn einu sinni á kostum þá var sóknarleikur Mahomes og félaga ekki sannfærandi. Vörnin er hins vegar miklu betri sem eru góðar fréttir.

Arizona Cardinals varð fyrsta liðið til að vinna tíu leiki í vetur þegar liðið vann 33-22 sigur á Chicago Bears. Höfrungarnir frá Miami eru líka á siglingu eftir fimmta sigurleik sinn í röð.

Detriot Lions var  síðasta liðið í deildinni til að vinna leik í vetur og eins og liðið hefur tapað mörgum leikjum á dramatískan hátt þá vantaði ekki dramatíkina í 29-27 sigri á Minnesota Vikings.

Útherjinn Amon-Ra St. Brown skoraði sigursnertimarkið um leið og leiktíminn rann út. Jared Goff fann nýliðann en Goff var þarna að vinna sinn fyrsta leik með Detroit Lions frá því að hann kom þangað frá Los Angeles Rams í skiptum fyrir Matt Stafford.

Detroit-liðið hafði klúðrað mörgum jöfnum leikjum í vetur og gert eitt jafntefli. Nú kom loksins fyrsti sigurinn og þjálfarinn Dan Campbell tileinkaði sigurinn fórnarlömbum skotárásarinnar í Oxford-menntaskólanum rétt fyrir utan Detroit-borg.

Kyler Murray kom aftur inn í lið Arizona Cardinals eftir meiðsli og leiddi það til 33-22 sigurs á Chicago Bears. Murray átti tvær snertimarkssendingar og skoraði líka tvö snertimörk sjálfur og liðið hefur nú unnið tíu af tólf leikjum tímabilsins sem er besti árangurinn í deildinni.

Tom Brady átti fjórar snertimarkssendingar þegar Tampa Bay Buccaneers vann 30-17 sigur á Atlanta Falcons. Meistarar Bucs hafa unnið 9 af 12 leikjum sínum og stigu einu skrefi nær að vinna Suðurriðil Þjóðardeildarinnar.

Patrick Mahomes átti ekki eina snertimarkssendingu en lið hans Kansas City Chiefs vann engu að síður 22-9 sigur á Denver Broncos. Mahomes skoraði eitt snertimark með því að hlaupa sjálfur með boltann yfir línuna. Chiefs-liðið hefur nú unnið fimm leiki í röð og er á toppnum í Vesturriðli Ameríkudeildarinnar.

Tua Tagovailoa átti tvær snertimarkssendingar þegar Miami Dolphins vann 20-9 sigur á New York Giants en liðið sem byrjaði tímabilið 1-7 er nú komið með 6-7 árangur eftir fimm sigurleiki í röð.

Hlauparinn Jonathan Taylor heldur áfram að blómstra en hann fór yfir hundrað jardana í sjöunda sinn í vetur og skoraði tvö snertimörk þegar Indianapolis Colts vann 31-0 sigur á Houston Texans. Texans varð um leið fyrsta liðið í deildinni sem á ekki lengur möguleika á sæti í úrslitakeppninni.

Baltimore Ravens missti toppsætið í Ameríkudeildinni eftir 20-19 tap á móti Pittsburgh Steelers. Þjálfarinn John Harbaugh reyndi að fá tvö stig eftir síðasta snertimarkið og vinna leikinn í stað þess að sparka fyrir aukastiginu og fara í framlengingu.

Seattle Seahawks hélt sínu tímabili á lífi eftir 30-23 sigur á San Francisco 49ers þrátt fyrir að lenda tíu stigum undir. Russell Wilson, leikstjórnandi Seahawks, átti sinn besta leik eftir að hann kom aftur til baka eftir meiðslin.

Spennan er gríðarlega í Ameríkudeildinni. New England Patriots er á toppnum með 8-4 árangur en tap í kvöld á móti Buffalo Bills myndi þýða að liðið dytti niður í fimmta sætið. Tennessee Titans, Baltimore Ravens og Kansas City Chiefs eru öll með átta sigra og fjögur töp eins og Patriots auk þess sem Bills nær því líka með sigri í kvöld.

Los Angeles Chargers og Cincinnati Bengals eru bæði með 7-5 árangur og inni í úrslitakeppninni eins og er en rétt á eftir eru lið Pittsburgh Steelers (6-5-1) og Indianapolis Colts (7-6). Þá má ekki gleyma Las Vegas Raiders, Cleveland Browns og Denver Broncos sem eru með 6-6 árangur og þá hið sjóðheita lið Miami Dolphins með 6-7 árangur. Það eiga því enn fjöldi liða góða möguleika á sæti í úrslitakeppni Ameríkudeildarinnar.