Real Madrid spænskur meistari

Real Madrid varð í kvöld spænskur meistari í fótbolta í 34. sinn þegar liðið vann Villarreal 2-1 á heimavelli.

Madrídingar unnu titilinn síðast árið 2017 en hafa þurft að horfa á eftir honum í hendurnar á Barcelona síðustu tvö ár. Nú fer bikarinn aftur í höfuðborgina, það er ljóst þrátt fyrir að enn sé ein umferð eftir af deildinni.

Karim Benzema skorað fyrstu tvö mörk Real í kvöld en Vicente Iborra minnkaði muninn á 83. mínútu og gestirnir voru mjög nálægt því að jafna metin í uppbótartíma en höfðu ekki erindi sem erfiði. Það hefði heldur ekki skipt máli þar sem að Barcelona tapaði gegn Osasuna og er sjö stigum á eftir Real.

Real Madrid hefur orðið spænskur meistari oftast allra félaga og er nú með átta titla forskot á erkifjendur sína í Barcelona.