Einkenni kulnunar komu hratt en það tekur sinn tíma að ná sér

Ungur íslenskur læknir sem sem glímdi við kulnun segir að einkennin hafi komið hratt og að hann hafi verið lengur að ná sér en hann bjóst við. Kulnun og streita er algeng meðal lækna um allan heim og rannsóknir hafa sýnt að hér á landi eru margir læknar sem glíma við slík einkenni.

Í nýlegri rannsókn sem gerð var hér á landi meðal rúmlega 700 lækna kom fram að meirihluti þeirra er undir gríðarlegu álagi og þeir finna fyrir einkennum sem eru truflandi eins og kvíða, depurð og einbeitingar­truflunum sem eru merki  ofurálags og jafnvel kulnunar.

Guðmundur Freyr Jóhannsson, lyf- og bráðalæknir, segist hafa fundið fyrir streitueinkennum en ekki áttað sig fyrr en ástandið var orðið fremur slæmt. Hann sagði frá sinni reynslu á ráðstefnu um streitu í Salnum í Kópavogi í dag sem bar heitið: Hver hugar að þinni heilsu kallinn minn og kona góð?

„Ég kom til baka úr fæðingarorlofi og fór að finna fyrir vaxandi einkennum eins svefntruflunum, pirringi, neikvæðni, kvíða og einbeitingarskorti í vinnunni. Þegar ég horfði svo til baka sá ég að einkennin voru byrjuð að gera vart við sig fyrr en þarna var ég virkilega byrjaður að taka eftir þeim,“ segir Guðmundur. 

Guðmundur ræddi við yfirmann sinn sem sýndi honum skilning og tók hann sér í framhaldinu árs launalaust leyfi. Hann segir að margt hafi spilað inní ástandið.

„Það er mikið álag á Landspítalanum og á bráðamóttökunni höfum við fundið fyrir vaxandi álagi eins og alþjóð veit. Svo bætast við ýmsir álagsþættir í einkalífi sem auka á það. Svefntruflanir eru t.d. álagsþáttur sem getur ýtt verulega á þetta,“ segir hann. 

Hann segist hafa notað tímann til að ná kröftum og kom hreyfingu inn jafnt og þétt. 

„Ég lagði mikla áherslu á að hvílast og endurheimta orkuna mína, smátt og smátt jókst starfsþrekið og ég fór í afleysingarstörf eftir því sem orkan mín leyfði. Þá kom ég hreyfingu inn jafnt og þétt. Það kom mér samt á óvart hvað þetta tók  langan tíma. Það að ná sér eftir svona er frekar reiknað í mánuðum eða árum en dögum. Stundum þegar ég held ég sé búinn að ná mér alveg finn ég að það vantar ennþá aðeins uppá. Þeir sem hafa rannsakað þetta ástand segja að það geti tekið nokkur ár að ná sér að fullu,“ segir Guðmundur

Guðmundur segir kulnun algenga meðal lækna hér á landi og erlendis. Þá sé mikil streita í íslensku samfélagi.

„Ég bjó í Svíþjóð um tíma og þar er þjóðfélagið mun hægara og áherslurnar aðrar en hér á landi. Við Íslendingar leggjum mikla áherslu á dugnað, vinnan göfgar manninn, er algengt máltæki hér.   En við verðum að passa að fara ekki framúr okkur og fá  hvíldina á móti. Þá tel ég mikilvægt að vinnustaðir og atvinnurekendur skoði vel hvernig vinnuumhverfi þeir skapa. Ef vi ðætlum að tækla hluti eins og kulnun í starfi þarf að skoða heildarmyndina,“ segir Guðmundur að lokum.