Tveir handteknir í aðgerð sem sérsveitin tók þátt í

Lögreglan á höfuðborgarsvæðinu með aðstoð sérsveitar ríkislögreglustjóra handtók tvo menn eftir að tilkynning barst um skotvopn í húsi í austurborginni síðdegis í dag. Lagt var hald á skotvopn en þau reyndust vera eftirlíking. Lögreglumenn sáust leita í bílum við hús í Síðumúla nú síðdegis.

Í tilkynningu frá lögreglunni segir að ekki sé hægt að veita frekari upplýsingar um málið. Fréttamaður Vísis sem var við vettvang aðgerðarinnar í Síðumúla sá lögreglumenn og hunda við byggingu þar. Lögreglumennirnir leituðu meðal annars í bílum á planinu fyrir utan, þar á meðal fyrirtækjabílum.