Tekjur United aldrei verið meiri

Þrátt fyrir að lítið gangi innan vallar hjá Manchester United gengur vel utan hans.

United birti í dag ársreikning sinn fyrir síðasta fjárhagsár. Tekjur félagsins voru 627,1 milljón punda sem er met. Hagnaður á árinu var 50 milljónir punda.

Tekjurnar verða væntanlega öllu lægri á næsta fjárhagsári þar sem United mistókst að tryggja sér sæti í Meistaradeild Evrópu á síðasta tímabili.

„Aðalmarkmiðið er að byggja upp frábært lið hérna,“ sagði Ed Woodward, hinn umdeildi stjórnarformaður United í dag.

Lítil ánægja er með störf hans hjá stuðningsmönnum United. Frá því hann tók við starfi stjórnarformanns 2013 hefur United aðeins einu sinni endað ofar en í 4. sæti ensku úrvalsdeildarinnar. Á sex árum í starfi hefur Woodward rekið þrjá knattspyrnustjóra; David Moyes, Louis van Gaal og José Mourinho.