Domino´s Körfuboltakvöld: Stelpurnar sem stóðu sig best um síðustu helgi

Níunda umferð Domino´s deildar kvenna í körfubolta fór fram á miðvikudagskvöldið og sú tíunda verður spilað í kvöld.

Það er mikil spenna í deildinni enda munar aðeins tveimur stigum, einum sigurleik, á efsta liðinu og liðinu í sjötta sæti.

Domino´s Körfuboltakvöld mun velja besta leikmanninn, besta þjálfara og fimm leikmanna úrvalslið í hverri umferð í vetur. Úrvalsliðið er valið undir sömu reglum og eru í gildi í deildinni það er einn útlendingur og fjórir íslenskir leikmenn.

Besti leikmaður umferðarinnar var Keflvíkingurinn Brittanny Dinkins en hún er að hljóta þessi verðlaun í annað skiptið. Brittanny var með 35 stig, 9 fráköst, 9 stoðsendingar og 5 stolna bolta í útisigri á Val auk þess að skora sex stig í 11-4 endaspretti Keflvíkinga í leiknum.

Thelma Dís Ágústsdóttir, liðsfélagi Brittanny Dinkins hjá Keflavík er einnig í liði umferðarinnar ásamt leikmönnum úr Skallagrími, Haukum og Breiðabliki. Þessir leikmenn eru Sigrún Sjöfn Ámundadóttir úr Skallagrími, Þóra Kristín Jónsdóttir úr Haukum og Sóllilja Bjarnadóttir úr Breiðabliki.

Ricardo Gonzáles, þjálfari Skallagríms, er besti þjálfari umferðarinnar en hann er fá þau verðlaun í annað skiptið. Skallagrímur vann sinn fjórða leik í röð í umferðinni.

Thelma Dís Ágústsdóttir úr Keflavík var með 17 stig, 6 fráköst, 5 stoðsendingar og 67 prósent skotnýtingu í 81-74 sigri Keflavíkur á Val. Hún var einnig með 3 varin skot og endaði með 27 framlagsstig og +16 í plús og mínus.

Þóra Kristín Jónsdóttir úr Haukum var með 10 stig, 5 stoðsendingar, 57 prósent skotnýtingu og engan tapaðan bolta á tæpum 19 mínútum í 98-57 sigri á Njarðvík í Ljónagryfjunni.

Sóllilja Bjarnadóttir úr Breiðabliki var með 15 stig, 8 fráköst og 6 stoðsendingar í 74-70 sigri Blika á Stjörnunni en hún hitti meðal annars úr öllum þremur þriggja stiga skotum sínum í leiknum.

Sigrún Sjöfn Ámundadóttir úr Skallagrími var með 15 stig og 9 fráköst í 67-56 sigri Skallagríms á Snæfelli í Stykkishólmi. Hún setti meðal annars niður öll sex vítin sín í leiknum.

Heil umferð fer fram í Domino´s deild kvenna í kvöld en sjónvarpsleikurinn á Stöð 2 Sport 4 verður leikur Skallagríms og Vals í Borgarnesi.

Á sama tíma mætast lið Hauka og Snæfells á Ásvöllum, Stjarnan fær Njarðvík í heimsókn í Garðabæinn og þá tekur Keflavík á móti Breiðabliki. Allir leikirnir hefjast klukkan 19.15.