Besti ungi leikmaður 1. deildarinnar til Vals

Ásta Júlía Grímsdóttir skrifaði í dag undir samning við körfuknattleiksdeild Vals um að leika með félaginu næstu tvö keppnistímabil.

Ásta Júlía, sem er fædd árið 2001, var valin besti ungi leikmaður 1. deildar á lokahófi KKÍ á dögunum. Hún hefur leikið með KR frá því að hún hóf að æfa körfubolta, var valin í U-15 í fyrra og U-16 landsiðið núna í sumar.

Ásta Júlía spilaði að meðaltali 23 mínútur með KR í 1. deildinni í vetur og skoraði 9,9 stig, tók 8,6 fráköst og var með 2,1 varið skot í leik.

 

Darra Frey Atlasyni, nýjum þjálfara Vals, líst vel á að fá Ástu Júlíu í hópinn.

„Ásta Júlía er með efnilegustu leikmönnum landsins og við erum mjög spennt fyrir hennar  framtíð á Hlíðarenda. Hún hefur alla burði til þess að ná eins langt og hún vill og við munum hjálpa henni af fremsta megni á leiðinni,“ er haft eftir Darra í fréttatilkynningu frá Val.

Ásta Júlía segist spennt að spreyta sig í Dominio‘s-deilinni næsta vetur.

„Ég er mjög spennt að spreyta mig í úrvalsdeildinni. Mér líst vel á hópinn og félagið. Darri var fyrsti þjálfarinn minn þegar ég kom upp í meistaraflokk þannig að það verður frábært að leika undir hans stjórn aftur,“ sagði Ásta Júlía.

Valur komst ekki í úrslitakeppnina í vetur en ætlar sér stærri hluti á næsta tímabili. Auk Ástu Júlíu er Valur búinn að semja við Guðrúnu Gróu Þorsteinsdóttur um að leika með liðinu.