Ferðamannasprenging í lúxusbúðum í Bretlandi

Ferðamenn flykkjast í auknum mæli í verslanir breska tískuvörumerkisins Burberry í Bretlandi, í kjölfar þess að gengi pundsins hefur hrunið gagnvart öðrum gjaldmiðlum.

Frá því að Bretar kusu að yfirgefa Evrópusambandið í lok júní hefur gengi pundsins lækkað um tugi prósenta gagnvart ýmsum gjaldmiðlum. BBC greinir frá því að ferðamenn séu í auknum mæli að flykkjast í verslanir Burberry í Bretlandi. Sala hjá Burberry í Bretlandi hefur aukist um þriðjung miðað við á sama tímabili í fyrra.

Forsvarsmenn fyrirtækisins segja að það sé fjölgun ferðamanna sem séu að nýta sér ódýrt gengi pundsins sem hafî drifið þessa aukningu.

Um 15 prósent af sölu Burberry kemur frá Bretlandi en engu að síður mun þessi aukning í sölu ýta undir aukinn hagnað í ár, samanborið við síðasta ár.

Gengi pundsins hefur fallið um 20 prósent síðan Brexit-kosningarnar svokölluðu áttu sér stað þann 23. júní og hefur gengið gagnvart evrunni lækkað um 16 prósent. Þetta hefur ýtt undir sölu, ekki einungis hjá lúxustískuverslunum heldur almennt í Bretlandi. Erlend kortavelta jókst um 3,4 prósent í ágúst milli ára og sala á netinu jókst um 5,3 prósent.

Glamour greindi frá því á dögunum að samkvæmt nýrri úttekt Deloitte er ódýrast að kaupa sér Louis Vuitton töskur og aðra merkjavöru í Bretlandi. Samkvæmt Deloitte er þó búist við breyttum tímum. Ef pundið styrkist ekki aftur bráðlega munu tískuhúsin líklega fljótlega hækka verðið á vörum sínum.