Helena og Haukakonur í ham í lokin og stöðvuðu sigurgöngu litlu systur

Helena Sverrisdóttir hafði enn á ný betur gegn litlu systur sinni en Haukakonur þurftu á frábærum fjórða leikhluta að halda til að landa sigri á móti Val í kvöld.

Haukakonur skoraði tíu stig í röð á lokakafla leiksins og tryggðu sér sex stiga sigur, 73-67, með því að vinna lokaleikhlutann 21-9.

Valsliðið var búið að vinna fjóra leiki í röð og var átta stigum yfir þegar aðeins níu mínútur voru eftir af leiknum.

Helena Sverrisdóttir var með 26 stig, 14 fráköst og 5 stoðsendingar í fjórða sigrinum í vetur á móti litlu systur sinni Guðbjörgu Sverrisdóttur í Val. Guðbjörg var með 7 stig, 10 fráköst og 3 stoðsendingar. Helena skoraði 19 af 26 stigum sínum í seinni hálfleiknum.

Karisma Chapman var Haukaliðinu erfið með 26 stig og 15 fráköst en Chelsie Alexa Schweers var næststigahæst hjá Haukum með 14 stig.

Valskonur byrjuðu vel og voru skrefinu á undan í fyrsta leikhlutanum, komust í 5-0 og 11-5. Haukaliðið jafnaði metin þegar á leið leikhlutann.

Haukakonur voru einu stigi yfir eftir fyrsta leikhlutann, 25-24, eftir að Helena Sverrisdóttir skoraði þriggja stiga körfu rétt fyrir lok hans.

Haukaliðið var komið með sex stiga forskot í öðrum leikhlutanum, 34-28, en gestirnir af Hlíðarenda ætluðu ekki að gefa neitt.

Valskonur skoruðu sex síðustu stig fyrri hálfleiksins og breyttu stöðunni úr 37-35 fyrir Hauka í 41-37 fyrir Val sem voru hálfleikstölurnar.

Valsliðið var sex sigum yfir, 51-45, þegar fjórar mínútur voru eftir af þriðja leikhlutanum en Helena Sverrisdóttir svaraði þá með fimm stigum í röð og munurinn var aftur eitt stig.

Valskonur áttu hinsvegar lokaorðið fyrir lok þriðja leikhlutans og voru sex stigum yfir, 58-52, fyrir lokaleikhlutann.

Valur komst mest átta stigum yfir, 60-52, í upphafi fjórða leikhlutans en Haukakonur áttu frábæran fjórða leikhluta og unnu síðustu níu mínútur leiksins 21-7.

Haukakonur gerðu endanlega út um leikinn með því að breyta stöðunni úr 61-65 fyrir Val í 71-65 með því að skora tíu stig í röð.



Haukar-Valur 73-67 (25-24, 14-17, 13-17, 21-9)

Haukar: Helena Sverrisdóttir 26/14 fráköst/5 stoðsendingar, Chelsie Alexa Schweers 14/4 fráköst/5 stoðsendingar, Auður Íris Ólafsdóttir 8/5 fráköst, Sólrún Inga Gísladóttir 6, Jóhanna Björk Sveinsdóttir 6, Sylvía Rún Hálfdanardóttir 5/7 fráköst/5 varin skot, Dýrfinna Arnardóttir 3, Pálína María Gunnlaugsdóttir 3/4 fráköst, María Lind Sigurðardóttir 2.

Valur: Karisma Chapman 26/15 fráköst, Bergþóra Holton Tómasdóttir 12/5 fráköst, Hallveig Jónsdóttir 9/7 stoðsendingar, Guðbjörg Sverrisdóttir 7/10 fráköst, Ragnheiður Benónísdóttir 6/5 fráköst, Dagbjört Samúelsdóttir 4, Margrét Ósk Einarsdóttir 3.