Smáfyrirtæki ræðst gegn SAS

Óli Tynes skrifar frá Svíþjóð.

Agnarlítið fyrirtæki í Hróarskeldu í Danmörku hefur höfðað mál á hendur SAS flugfélaginu fyrir meintan þjófnað á einkaleyfi. Árið 1993 fékkst einkaleyfi fyrir nýja tegund af færibandi sem flytur farangur langt inn í farangursrými flugvéla. Það léttir hleðslumönnum lífið og flýtir hleðslunni umtalsvert.

Fyrirtækið Power Stow í Hróarskeldu keypti þetta einkaleyfi fimm árum síðar. Það þróaði hugmyndina áfram og hóf framleiðslu undir nafninu Rollertrack.

Fyrst árið 1998 hóf dótturfyrirtæki SAS, RASN A/S að þróa samskonar færiband undir nafninu Rampsnake.

Power Stow hafði samband við SAS og bað menn að láta af þessum fjára. SAS neitaði og sagðist sjálft hafa fengið hugmyndina. Power Stow hefði stolið henni.

Forstjóri Power Stow segir að þeir hafi þegar tapað um 180 milljónum íslenskra króna á frekjunni í SAS. Þeir peningar og meira til, verði sóttir til flugfélagsins með lögsókn.