Spá ó­breyttum stýrivöxtum

Íslandsbanki og Landsbankinn hafa spáð 0,25 prósenta hækkun stýrivaxta sem myndi þýða að meginvextir færu í 7,5%. Báðar greiningar röktu að verðbólgan væri hærri en gert var ráð fyrir og verðbólguhorfur ekki góðar. Þó var tekið fram að peningastefnunefndin gæti haldið vöxtum óbreyttum.

Aðalhagfræðingur Arion banka telur hins vegar að vextirnir verði óbreyttir að þessu sinni og nefndin vilji frekar bíða og sjá hver staðan verður eftir tvo mánuði. Nýjustu kortaveltutölur sem bárust í morgunsárið séu kaldari en áður.

„Auðvitað getur maður ekki dregið of miklar ályktanir af einni mælingu en engu að síður þá bendir þetta til þess að það sé aðeins að hægja á neyslu í kerfinu,” segir Erna Björg Sverrisdóttir, aðalhagfræðingur Arion banka.

Það komi til viðbótar við kólnun á vinnumarkaði. Atvinnuleysi sé að aukast, atvinnuhorfur að versna og fasteignamarkaðurinn sömuleiðis að kólna.

Framsýn leiðsögn Seðlabankans á síðasta vaxtaákvörðunarfundi hafi gert ráð fyrir lækkun. Búast megi við harðari tón frá nefndinni en að vextir standi í stað.

„Þó að verðbólguhorfur hafi versnað þá auðvitað má að miklu leyti rekja það til stríðsátaka og hækkandi olíuverðs. Og það er algjörlega fyrir utan valdsvið nefndarinnar, þannig að að einhverju leyti ætti hún að geta horft í gegnum fingur sér hvað þau áhrif varðar á verðbólguna. Auðvitað tók hún líka stökk upp á við um áramótin þegar það komu breytingar í gjaldtöku hjá hinu opinbera. Þetta er eitthvað sem nefndin hefur kannski ekki beint á sína könnu en hún óttast auðvitað áhrifin á verðbólguna þegar að hún hefur verið þetta þrálát,“ segir Erna Björg en Arion banki á von á að verðbólgan verði mikil fram á sumarið.

„Eins og staðan er í dag að þá sjáum við fyrir okkur að verðbólgan verði mikil núna í mars og áfram í apríl og maí en verði vonandi komin undir 5% inn í júní,” segir Erna Björg Sverrisdóttir.