Nauðasamningur Rammagerðarinnar samþykktur: Bjóða 25 aura á krónuna

Árni Sæberg skrifar 21. september 2026 13:59

Stærsta verslun Rammagerðarinnar er í gamla Kirkjuhúsinu á Laugavegi. Vísir/Ívar Fannar

Rammagerðin ehf., sem rekur samnefndar gjafavöruverslanir, hefur gert nauðasamning við kröfuhafa, sem á nú aðeins eftir að staðfesta fyrir dómi. Samkvæmt samningnum fá þeir sem eiga kröfur allt að hundrað þúsund krónum kröfur sínar greiddar að fullu en aðrir fá aðeins fjórðung krafna greiddan. Greiðslu fjórðungs kröfuupphæðar verður dreift yfir sjö ár, án vaxta og tryggingar.

Líkt og Vísir greindi frá í júlí fékk Rammagerðin heimild hjá Héraðsdómi Reykjaness til að leita nauðasamninga við lánardrottna sína og aðra kröfuhafa þann 2. júlí síðastliðinn.

Samningur samþykktur í lok ágúst

Markmið nauðasamnings er að ráða bót á ógjaldfærni skuldara og þá einkum með því að lækka skuldir þannig að skuldari verði frekar fær um að standa í skilum.

Í auglýsingu Héraðsdóms Reykjavíkur í Lögbirtingablaðinu í dag segir að fyrir hönd stjórnar Rammagerðarinnar hafi Heiðar Ásberg Atlason lögmaður krafist staðfestingar á nauðasamningi á grundvelli samningsfrumvarps, sem samþykkt hafi verið á fundi atkvæðismanna þann 25. ágúst síðastliðinn.

Einn fjórði greiddur á sjö árum

Þá segir að umsjónarmaður nauðasamningaumleitana, Sigurður Kári Kristjánsson lögmaður, hafi staðfest að frumvarp að nauðasamningi hafi verið samþykkt með nægilegum fjölda atkvæða kröfuhafa, bæði samkvæmt höfðatölu og samkvæmt kröfufjárhæð.

Umsjónarmaður telji samningsboð félagsins sanngjarnt gagnvart kröfuhöfum þess í skilningi laga um gjaldþrotaskipti og fleira og telji rétt að nauðasamningurinn hljóti staðfestingu héraðsdóms.

Frumvarp Rammagerðarinnar ehf. að nauðasamningi sé svohljóðandi:

Kröfuhöfum er boðin lágmarksgreiðsla þannig að kröfur til og með fjárhæð kr. 100.000 greiðist að fullu.
Kröfuhöfum sem fara með samningskröfur að fjárhæð kr. 100.001 til kr. 10.000.000, að teknu tilliti til greiðslu skv. 1. gr. er boðin greiðsla á 25 hundraðshlutum (%) krafna sinna.
Kröfuhöfum sem fara með samningskröfur að fjárhæð kr. 10.000.001 og hærri, að teknu tilliti til greiðslna skv. 1. og 2. gr., er boðin greiðsla á 25 hundraðshlutum (%) krafna sinna.
Greiðslur munu fara fram með þeim hætti að lágmarksgreiðsla skv. 1. gr. fari fram innan fimmtán (15) daga frá staðfestingu nauðasamnings. Greiðslur skv. 2. og 3. gr. fari fram í áttatíu og fjórum (84) jöfnum greiðslum, þeirri fyrstu innan fjörutíu og fimm (45) daga frá staðfestingu nauðasamnings og síðan mánaðarlega upp frá því.
Ekki er gert ráð fyrir greiðslu vaxta af samningskröfum heldur er miðað við stöðu þeirra þann 2. júlí 2026.
Trygging verður ekki veitt fyrir greiðslum samkvæmt framangreindu.

Loks segir að með auglýsingunni sé skorað á þá, sem telja sig hafa andmæli fram að færa gegn staðfestingu nauðasamnings með ofangreindum skilmálum, að mæta á dómþing Héraðsdóms Reykjavíkur, sem verði háð í Dómhúsinu við Lækjartorg, dómsal 203, þriðjudaginn 29. september 2026, klukkan 14:30, þegar krafan verður tekin fyrir.

Verslun Reykjavík Gjaldþrot

Mest lesið

Fleiri fréttir