Eldur í Elliða­ár­dal

Varðstjóri hjá Slökkviliði höfuðborgarsvæðisins staðfesti þetta í samtali við Vísi. Búið er að slökkva eldinn.

Tilkynningin barst rétt fyrir klukkan hálf sjö í kvöld. Töluverður reykur barst frá húsinu og sást hann langar leiðir. Asbest var í húsinu og var íbúum í nágrenninu leiðbeint að loka öllum gluggum vegna mengunarinnar. Þrátt fyrir það fór fram leikur Víkings og Keflavíkur á Víkingsvellinum sem er nærri eldsupptökunum. 

Reykurinn sást vel af vellinum líkt og sjá má á þessu myndskeiði.

Fréttastofa náði tali af Gunnari Guðmundssyni lungnalækni sem taldi reykinn ekki lífshættulegan.

Mikill fjöldi viðbragðsaðila var á vettvangi og tókst að slökkva eldinn á um klukkustund. Við tók reykræsting og samkvæmt upplýsingum frá varðstjóra slökkviliðsins lýkur henni í kvöld. 

„Það tekur svolítinn tíma að reykræsta svona stórt hús,“ sagði Lárus Steindór Björnsson varðstjóri.

Ekki liggur fyrir hversu miklar skemmdir urðu á húsnæðinu sem var áður í eigu Reykjavíkurborgar. Húsið var byggt árið 1946 sem olíu- og kolakynnt varaaflsstöð með Marshall-aðstoðinni. Notkun hússins lagðist af að mestu leyti eftir 1980.

Húsið var selt í febrúar á þessu ári og til stóð að hýsa þar jaðaríþróttagreinar og aðra starfsemi sem stutt gæti við eflingu útivistar og tómstunda í Elliðaárdal. Áætlaður byggingartími var þá þrjú ár.

Fylgst var með þróun mála í vaktinni hér fyrir neðan. Ef vaktin birtist ekki er ráð að endurhlaða síðuna.