Vara­maður Ómars hetja Magdeburgar

Magdeburg lenti í óvenjulega miklum vandræðum í heimsókn liðsins til Balingen í dag. Heimamenn komust mest fjórum mörkum yfir í fyrri hálfleik en staðan í hálfleik var 15-13 fyrir Balingen.

Við tók jafn síðari hálfleikur þar sem liðin skiptust á forystunni. Þegar rúm mínúta var eftir jafnaði Matthias Musche metin fyrir Magdeburg af vítalínunni, staðan 30-30.

Magdeborgarar stóðu af sér næstu vörn og fóru upp í sókn. Þar skoraði sænska hægri skyttan Albin Lagergren það sem reyndist sigurmarkið þegar ein sekúnda var eftir. Flautan gall og Magdeburg vann nauman 31-30 sigur.

Liðið er því jafnt Kiel og Flensburg við topp deildarinnar en öll þrjú hafa unnið fyrstu þrjá leiki sína í deildinni.

Gísli Þorgeir Kristjánsson skoraði fjögur mörk úr fimm skotum í dag og lagði upp sex. Elvar Örn Jónsson komst ekki á blað og þá er Ómar Ingi Magnússon enn utan Magdeburgarliðsins vegna meiðsla.