Tryggvi átti stór­leik í sigri gegn toppliðinu

Topplið Real Madrid hafði aðeins tapað fjórum leikjum á öllu tímabilinu fyrir heimsóknina til Tryggva og félaga í Bilbao í dag. Leikurinn var æsispennandi en heimamenn læstu gestina úti á lokamínútunum og fóru með sigurinn.

Tryggvi skoraði 22 stig auk þess að grípa 7 fráköst og gefa stoðsendingu. Þá varði hann boltann líka þrisvar frá sóknarmönnum Madrídinga.

Tryggvi var ekki bara stigahæstur heldur skilaði hann stigum á mikilvægum tímapunktum.

Bilbao var sjö stigum undir þegar tæpar sjö mínútur voru eftir en Tryggvi skoraði tvisvar í röð og minnkaði muninn. Hann átti síðan körfuna sem kom Bilbao yfir á ný, þegar um tvær mínútur voru eftir.

Eftir sigur dagsins er Bilbao í 8. sæti spænsku deildarinnar en Unicaja á leik til góða og getur jafnað. Aðeins þrjár umferðir eru eftir af deildinni en átta efstu liðin fara í úrslitakeppni.