Kefla­víkur­flug­völlur á varaafli vegna eldingar

Samkvæmt upplýsingum frá Isavia varð rafmagnslaust á flugvellinum um klukkan átta í gærkvöldi. Engar raskanir urðu á flugferðum eða starfsemi flugvallarnis heldur var hann keyrður á varaafli.

Hér má sjá myndskeið sem lesendur Vísis náðu af eldingum.

Halldór Halldórsson, öryggisstjóri hjá Landsneti, segir í samtali við fréttastofu að víða hafi orðið rafmagnslaust vegna stórrar eldingarinnar sem laust niður í Búrfellslínu. Varnarkerfi Landsnets virkaði sem skyldi og var rafmagnið komið á eftir nokkrar klukkustundir.

Rafmagnslaust varð á Suðurnesjum, Suðurlandi og í Vestmannaeyjum en búið var að koma rafmagninu aftur á á innan við klukkustund. Lengst var rafmagnslaust í Mosfellsbæ eða í nokkrar klukkustundir.

„Það gekk mjög að leysa úr þessu,“ segir Halldór.

„Kerfið virkaði nákvæmlega eins og það átti að gera.“

Austanbylur gekk yfir landið í gær og voru bæði gular og appelsínugular veðurviðvaranir í gildi. Víða á Suðurlandi laust eldingum niður og var flugferðum aflýst eða seinkað vegna veðursins.

Icelandair fellti niður flug frá Norður-Ameríkur sem áttu að lenda í morgun og öllu innanlandsflugi í gær var aflýst. 

Ekki þurftu margir að dvelja í flugstöðinni vegna breytinga á  flugferðum samkvæmt upplýsingum frá Isavia. Helst voru það þeir sem áttu ferð með erlendum flugfélögum sem dvöldu þar yfir nótt.

Fréttin var uppfærð með viðtali við Halldór Halldórsson.