„Nær alltaf að spýta ein­hverri geð­veiki í þetta lið“

ÍR mætir til leiks talið töluvert ólíklegra til árangurs líkt og taflan sýnir. ÍR-ingar hafa hins vegar verið sérfræðingar í því, undir stjórn Borsche Ilievski, að slá upp fyrir sig og iðulega látið lið sem eru sterkari á pappír hafa rækilega fyrir hlutunum.

„Borsche nær alltaf árangri og nær alltaf að spýta einhverri geðveiki í þetta ÍR-lið. Þetta eru strákar sem eru til í að vaða eld og brennistein fyrir þjálfarann sinn. Maður sér það á því hvernig þeir spila, að hann nær að búa til hóp af leikmönnum sem eru ekki endilega bestu leikmenn deildarinnar en nær þessum púslum, leikmenn sem verða ÍR-leikmenn,“ segir Hermann Hauksson, sérfræðingur Körfuboltakvölds.

„Þetta lið er stór, stórhættulegt,“ segir Hermann enn fremur.

„Besta leiðin til að hægja á Tindastóli er að skora á þá. Sem hefur reynst svolítið erfitt. Það er ástæðan fyrir því að þeir geta hlaupið völlinn helvíti hratt. Þeir eru frábært varnarlið. Þeir geta farið hratt af stað, með fljóta leikmenn en eru líka með þannig leikmenn að þeir geta aðlagað sig að hálfum velli og þunglamalegri körfubolta. Með (Adomas) Drungilas, (Davis) Geks, Pétur (Rúnar Bjarnason) á auðvelt með að setja upp leiki. Pétur fær oft aukið vægi í úrslitakeppninni. Það er valinn maður í hverju rúmi þarna í Tindastóli,“ segir Sævar Sævarsson um Tindastólsliðið sem er talið töluvert sigurstranglegra fyrir einvígið sem hefst í kvöld.

Fleira kemur fram í umræðunni sem sjá má í spilaranum.

Leikur Tindastóls og ÍR er klukkan 19:00 í kvöld en bein útsending hefst klukkan 18:50 á Sýn Sport Ísland 2.

Allir fjórir leikir gærkvöldsins og kvöldsins í kvöld verða gerðir upp í Bónus Körfuboltakvöldi eftir leikinn á Hlíðarenda klukkan 21:15.