Þjálfarinn á Tene degi fyrir leik í úr­slita­keppni: „Ég væri brjáluð“

Keflavík tapaði fyrsta leik sínum gegn KR í einvígi liðanna í átta liða úrslitum Bónus deildar kvenna í körfubolta í gær. 

Meint fjarvera þjálfara Keflavíkur í aðdraganda leiksins mikilvæga vakti furðu í umræðu um leikinn í Körfuboltakvöldi á Sýn Sport Ísland í gær.

Hörður Axel Vilhjálmsson, þjálfari Keflavíkur, er sagður hafa verið staddur á Tenerife, degi fyrir leikinn gegn KR, fyrsta leik Keflavíkur í úrslitakeppninni þetta tímabilið.

„Ef þú þarft svona mikið frí þá kannski þarftu líka að stíga til hliðar á þessum tímapunkti,“ sagði Embla Kristínardóttir, tvöfaldur Íslandsmeistari og sérfræðingur Körfuboltakvölds.

Undirbúningurinn sé það mikilvægasta í þessum bransa. Sértu ekki undirbúinn þá ertu ekki tilbúinn í leikinn.

„Þú ert að undirbúa þig fyrir úrslitakeppni en ert ekki einu sinni með liðinu þínu. Mér finnst þetta svo mikil vanvirðing,“ sagði Ólöf Helga Pálsdóttir, þáttastjórnandi Körfuboltakvölds um fjarveru Harðar Axels, þjálfara Keflavíkur, í aðdraganda fyrsta leiks í úrslitakeppninni.

„Veit ekki hvern djöfulinn hann var að gera á Tenerife“

Bæði Ólöf og hennar sérfræðingar höfðu það eftir öruggum heimildum að þetta væri staðan. Að Hörður hafi verið á Tenerife í aðdraganda fyrsta leiks í úrslitakeppninni gegn KR.

„Ég ætla að segja þetta með fyrirvara,“ sagði Hallveig Jónsdóttir, þrefaldur Íslandsmeistari og einn af sérfræðingum Körfuboltakvölds og hóf síðan eldræðu sína. „Ég veit ekki hvern djöfulinn hann var að gera á Tenerife. Hvort þetta hafi verið eitthvað neyðarástand eða hvort hafi verið um að ræða eitthvað sem samið hafði verið um fyrir löngu síðan.

Ef ég væri leikmaður Keflavíkur þá væri ég brjáluð. Þú ert að fara í fyrsta leik í úrslitakeppninni, á móti liði sem endar fyrir ofan þig í deildarkeppninni. Þú ert búinn að vera drulla í þig einhvern veginn allt tímabilið og ætlar ekki að vera með í undirbúningi. Ég væri brjáluð sem leikmaður.“

Ólöf og hennar sérfræðingar höfðu síðan einnig heyrt af því að Hörður Axel hefði fryst Bríeti Sif Hinriksdóttur, leikmann Keflavíkur, á bekknum sökum þess að hún hefði misst af æfingu vegna vinnu.

„Hefði ekki bara átt að frysta hann?“ spurði Ólöf en umræðuna um Hörð Axel og lið Keflavíkur í Körfuboltakvöldi má sjá ofar í fréttinni.