Hæst­á­nægður á Ís­landi þrátt fyrir neglu í and­litið

Sá sem átti kannski stærstan þátt í sigrunum tveimur var markvörðurinn frábæri Mikael Appelgren sem var með 46% markvörslu í fyrri leiknum og varði svo heil 26 skot í seinni leiknum (52%).

Appelgren birti skemmtilega færslu á Instagram eftir ferðina með myndum úr fyrri leiknum í N1-höllinni á Hlíðarenda, úr smiðju ljósmyndarans Hafliða Breiðfjörð. 

Þar má sjá þá Viggó Kristjánsson og Appelgren, sem og annan af dómurum leiksins, alla skælbrosandi jafnvel þó að ekki virðist í fyrstu tilefni til þess. Viggó hafði nefnilega skotið boltanum í andlit Appelgrens og dómarinn neyðst til að veita Seltirningnum tveggja mínútna brottvísun.

„Sjaldgæf stund. Einn fær skot í andlitið, einn veitir refsingu, einn fær tvær mínútur, EN allir brosa. Frábær vika á Íslandi með landsliðinu,“ skrifaði Appelgren með myndinni á Instagram.

Viggó skoraði öll fimm mörk sín í leiknum á Hlíðarenda úr vítaköstum en öll þrjú skot hans úr opnum leik voru varin. Hann var svo langmarkahæstur í seinni leiknum í Kaplakrika með sjö mörk, þar af þrjú úr vítum, úr alls tólf skotum.