Gæti orðið ein­vígi á milli Njarð­víkur og Kefla­víkur í fyrstu um­ferð

Haukar og KR spila um deildarmeistaratitilinn og heimavallarrétt út alla úrslitakeppnina. Haukarnir eru á heimavelli og geta ekki endað neðar í öðru sæti en tap hjá KR-konum gæti þýtt að liðið dytti niður í þriðja sætið.

Njarðvíkurkonur hafa verið mikið á toppnum í vetur en misstu af deildarmeistaratitlinum með tapi á móti KR í síðustu umferð.

Njarðvíkurkonur geta enn náð öðru sætinu í deildinni en þær gætu líka lent í því að lenda á móti nágrönnum sínum í Keflavik í átta liða úrslitum úrslitakeppninnar. Keflavíkurkonur voru í neðri hlutanum.

Það eru fleiri en leið að því að fá Reykjanesbæjarslag í fyrstu umferð úrslitakeppninnar.

Njarðvíkurkonur enda í annaðhvort öðru eða þriðja sæti og mæta þá liðinu í sjötta eða sjöunda sæti. Það eru einmitt sætin sem Keflavíkurliðið getur endað í.

Stjörnukonur geta einnig náð sjötta og sjöunda sætinu og Tindastólsliðið á einnig möguleika á sjöunda sætinu.

Njarðvík verður í öðru sætinu ef liðið vinnur Val á sama tíma og Haukar vinna KR. Til að mæta Keflavik þyrftu nágranner þeirra að enda í sjöunda sæti. Keflavíkurkonur enda þar ef þær tapa lokaleik sínum á móti Stjörnunni.

Njarðvík verður í þriðja sætinu ef liðið tapar fyrir Val eða að þær vinna Val en KR-konur vinna Hauka. Þá þyrftu Keflavík að enda í sjötta sæti til að við fengjum Reykjanesbæjarslag og þar enda þær með því að vinna Stjörnuna í lokaumferðinni.

Njarðvík og Keflavík hafa fimm sinnum mæst í úrslitakeppni kvenna en aldrei í átta liða úrslitum. Félögin hafa mæst þrisvar í undanúrslitum (2003, 2023 og 2025) og svo tvisvar í lokaúrslitum (2011 og 2024).

Lendi liðið á móti hvort öðru í komandi úrslitakeppni verður það fjórða árið í röð sem Reykjanesbæjarliðin mætast í úrslitakeppni en karlalið félagsins hafa aftur á móti ekki mæst í úrslitakeppninni í sextán ár (Undanúrslit 2010).

Hér fyrir ofan má sjá í hvaða sætum liðin geta endað eftir leiki kvöldsins.

Allir fjórir leikir kvöldsins verða í beinni útsendingu á sportstöðvunum í kvöld og Skiptiborðið mun fylgjast með öllum leikjunum í einu. Eftir leikina mun Bónus Körfuboltakvöld kvenna gera allt upp.