„Að vera í þessum í­þróttum er stans­laus þjáning“

„Mér fannst stelpurnar ótrúlega flottar og bara sterkar. Þetta er gott lið sem við erum að spila við í kvöld sem endaði í áttunda sæti á HM, tapaði fyrir noregi í átta liða úrslitum og fóru illa með okkur á því móti. En við fundum það líka þegar við vorum að horfa á þann leik aftur og gera mótið upp að við gátum gert betur og við gerðum það heldur betur í kvöld. Ég er bara stoltur af stelpunum og afskaplega kátur.“

Strax frá fyrstu mínútu leiksins var ljóst að íslenska liðið bjó yfir gríðarlegri orku í leik kvöldsins.

„Já, það er alveg hárrétt. Það er búið að ganga á ýmsu og við erum búin að missa stóra og sterka pósta út úr þessu. En mér fannst við alveg frá fyrstu mínútu vera með einhverja orku. Við vourm að skapa okkur fullt af færum sem við vorum kannski ekki alveg að nýta nægilega vel í upphafi, en við héldum alltaf áfram. Við spiluðum bara virkilega vel og unnum þetta sætt.“

Íslenska liðið varð fyrir áfalli seint í leiknum þegar markvörðurinn Hafdís Renötudóttir þurfti að fara af velli eftir að hafa fengið skot í andlitið. Sara Sif Helgadóttir kom inn á í hennar stað og varði víti á ögurstundu, en eðlilega eru vondar fréttir fyrir liðið ef aðalmarkvörðurinn er frá.

„Ég veit ekki hvernig staðan er á henni. Hún var bara ekki klár í að spila áfram. Sama með Katrínu Tinnu í fyrri hálfleik. Við tökum enga sénsa með þessi höfuðhögg og þurfum bara að meta stöðuna í kvöld.“

„Sara kom flott inn í þetta og tók þetta víti sem skipti sköpum og ég er með fullt af flottum stelpum í þessu liði. Við erum með ungan, skemmtilegan og viljugan hóp. Ég treysti þeim öllum til að spila, en auðvitað spilaðist þetta þannig í dag að það voru misskipt hlutverk, en þú finnur það að orkan er góð. Þær eru allar klárar og allar tilbúnar í þetta og tilbúnar að taka þátt og fagna með liðinu.“

„Svo ég klári að svara spurningunni þá neyddist ég til að taka Hafdísi út af í kvöld, en vonandi er það ekkert alvarlegt. Við verðum bara að sjá hvernig það verður á eftir því við fljúgum auðvitað bara út í nótt.“

Já, flug í nótt og annar leikur gegn Svartfellingum strax á sunnudaginn. Getur íslenska liðið hadlið uppi sama orkustigi þá og í kvöld?

„Nú reynir bara svolítið á okkur. Við ætlum klárlega að njóta svolítið í kvöld og ætlum að njóta þess í fluginu að hafa gert svona vel. Að vera í þessum íþróttum er stanslaus þjáning þannig að þegar það er tilefni til að njóta þá verðum við að leyfa okkur það. Svo verðum við að ná að hvíla á morgun, núllstilla okkur og byrja að einbeita okkur að leiknum á sunnudaginn. Það reynir aðeins á okkur núna að ná þessu upp aftur, en ég treysti þessum stelpum alveg til þess. Þetta eru karakterar.“

Arnar vildi þó ekki fara of langt fram úr sér þrátt fyrir að fyrsti sigurinn í riðlinum væri kominn í hús.

„Við erum enn í brekku í þessum riðli og þurfum bara að halda áfram að gera vel til að reyna að spóla upp hana áfram. Það er markmiðið. Okkur langar á annað stórmót og til að það gerist þurfum við að vinna vel og halda þessu áfram,“ sagði Arnar að lokum.