Elliði í liði um­ferðarinnar eftir mörkin níu gegn Kiel

Gummersbach, sem Guðjón Valur Sigurðsson stýrir, vann Kiel á útivelli á laugardaginn, 26-34. Heimamenn voru marki yfir í hálfleik, 15-14, en gestirnir unnu seinni hálfleikinn með níu marka mun, 11-20.

Elliði fór mikinn í leiknum og skoraði níu mörk úr tíu skotum. Hann var markahæstur í liði Gummersbach sem hefur verið á afar góðu skriði að undanförnu.

Eyjamaðurinn er í liði 23. umferðar þýsku deildarinnar ásamt samherja sínum, króatíska markverðinum Dominik Kuzmanovic. Hann varði tuttugu skot í leiknum gegn Kiel.

Elliði hefur skorað 88 mörk í þýsku deildinni á þessu tímabili og er með 81 prósenta skotnýtingu. Hann er þriðji markahæsti línumaður deildarinnar á eftir þýsku landsliðsmönnunum Jannick Kohlbacher hjá Rhein-Neckar Löwen og Johannes Golla hjá Flensburg.

Sigur Gummersbach á laugardaginn var fyrsti sigur liðsins í Kiel í tvo áratugi og jafnframt jöfnun á stærsta sigri Gummersbach á Kiel í sögunni.

Gummersbach hefur unnið fimm leiki í röð og er í 6. sæti þýsku deildarinnar með 31 stig.