Þurfi að draga úr of­beldi gegn eldri borgurum

Ályktunin var niðurstaða á aðalfundi Félags eldri borgara í Reykjavík og nágrenni í dag. 

Í janúar var greint frá því að tvöfalt fleiri eldri borgarar leituðu til Bjarkarhlíðar vegna ofbeldis í fyrra en árið áður. Algengast sé að uppkomin börn beiti foreldra sína ofbeldi, til að mynda andlegu ofbeldi og fjárhagsofbeldi. Það geti líka falist í vanrækslu þarfa þeirra á við að neita þeim um lífsnauðsynleg lyf.

„Ýmis teikn eru á lofti um að tilfellum um ofbeldi gagnvart öldruðu fólki fari fjölgandi. Vakin hefur verið athygli á að mjög lítill hluti ofbeldis af þessum toga er tilkynntur til lögreglu eða annarra hlutaðeigandi yfirvalda. Skýringar liggja í því að oftast eru gerendur nánir ættingjar, heilbrigðisstarfsfólk, vinir eða trúnaðarvinir sé tekið mið af rannsóknum um þessi mál í öðrum norrænum ríkjum,“ segir í ályktuninni.

„Umræða síðustu mánaða um þessi mál hefur leitt í ljós að ofbeldi gegn öldruðu fólki er algengara en flesta hafði almennt grunað.“

Samkvæmt gögnum Alþjóðaheilbrigðismálastofnunarinnar verður um einn af hverjum sex í hópi sextíu ára og eldri fyrir ofbeldi á hverju ári. Þá viðurkenni 75 prósent starfsfólks á stofnunum að hafa beitt ofbeldi.