Valskonur upp í annað sætið og Tinda­stóll sótti sterkan sigur

Valskonur voru þarna að vinna fjórða leikinn af síðustu fimm og komust upp fyrir ríkjandi Íslandsmeistara Hauka, sem töpuðu fyrir Njarðvík í toppslag í kvöld.

Leikur Vals og Stjörnunnar var spennandi framan af, en í seinni hálfleik stigu heimakonur á Hlíðarenda á bensíngjöfina.

Stjörnustelpurnar voru samt alltaf í baksýnisspeglinum og veittu fína samkeppni, minnkuðu muninn alla leið niður í eitt stig undir lok leiks en komust ekki nær.

Alyssa Marie Cerino var stigahæst í leiknum með 26 stig, greip að auki 10 fráköst og gaf 5 stoðsendingar.

Leikur Ármanns og Tindastóls var öllu minna spennandi. Gestirnir frá Sauðárkróki unnu öruggan, og mikilvægan, tæplega tuttugu stiga sigur.

Sigur Tindastóls breikkar bilið enn frekar milli efstu átta og neðstu tveggja liða deildarinnar. Tindastóll er núna með 12 stig en Ármann og Hamar/Þór aðeins með 4 stig.