Val­höll seld en ó­víst með fram­haldið

Þetta segir í fréttatilkynningu frá Alva capital en greint var frá því í síðustu viku að samningaviðræður um kaupin væru á lokametrunum.

Hús með töluverða arfleifð

Í tilkynningu segir að húsið hafi um áratugaskeið verið eitt þekktasta kennileiti borgarinnar og hafi lengst af verið þekkt sem höfuðstöðvar Sjálfstæðisflokksins. Valhöll sé hús með töluverða arfleifð og sterka stöðu í borgarmyndinni. Með tilkomu Alva capital hefjist nýr kafli í sögu hússins þar sem áhersla verði lögð á að virða sögu þess og sérstöðu

„Við lítum á Valhöll sem einstaka byggingu með ríka menningarlega arfleið í sögu landsins. Það er okkur mikilvægt að standa vörð og virðingu um húsið og halda í þá ímynd sem það hefur skapað sér í gegnum tíðina,“ er haft eftir Skorra Rafni Rafnssyni, forstjóra og eiganda Alva capital.

Kemur í ljós hvað verður í húsinu

Á næstu misserum muni Alva capital vinna að þróun nýrrar starfsemi í húsinu. Stefnt sé að því að breyta hlutverki þess á þann hátt að það verði lifandi hluti af nærumhverfi hússins.

„Þetta er spennandi og krefjandi verkefni. Við lítum á þetta sem langtímafjárfestingu og það verður spennandi verkefni að endurskapa nýja lífdaga í Valhöll án þess að raska þeim sögulega og menningarlega grunni sem húsið stendur á. Endanleg ákvörðun um hvaða starfsemi muni verða í Valhöll í framtíðinni liggur ekki fyrir á þessu stigi en við munum kynna það þegar niðurstaða er komin, sem ætti að vera innan tíðar,“ er haft eftir Skorra Rafni.

Líkt og fjallað var um síðustu viku hefur skipulagsfulltrúi tekið jákvætt í fyrirspurn Alva fasteigna ehf., dótturfélags Alva capital, um möguleikann á hótelrekstri í Valhöll. Bygging annarrar hæðar ofan á húsið var hins vegar útilokuð.