Simmi Vill í með­ferð

Þetta segir Sigmar Vilhjálmsson athafnamaður, einnig þekktur sem Simmi Vill, og greinir frá því að hann hafi skráð sig í meðferð vegna áfengisvanda. Sjúkdómurinn hafi tekið of mikið pláss í lífinu og haft neikvæð áhrif á samskipti og ákvarðanir síðastliðin tvö ár.

„Ég er að deila þessu með ykkur hér til að hlífa mínum nánustu frá því að verða upplýsingafulltrúar mínir næstu 6 vikurnar og vonandi að koma í veg fyrir að það komi fram kjaftasögur um mig sem mitt nánasta fólk sér sig knúið til að leiðrétta,“ segir Sigmar í færslu á Facebook-síðu sinni.

Tekur sér hlé frá samfélagsmiðlum

„Ég er stoltur af þessari ákvörðun. Hún er tekin fyrir heilsuna mína, mína nánustu og framtíðina,“ bætir Sigmar við. Hann sé þakklátur fyrir allan stuðning.

Í myndbandi greinir Sigmar frá því að hann muni ekki vera áberandi á samfélagsmiðlum næstu fimm til sex vikurnar. Þá muni hann einnig taka sér hlé frá gerð hlaðvarpsþátta. Sigmar segist hafa undirbúið þessa ákvörðun í nokkurn tíma „enda orðið tímabært.“ Áfengi hafi verið honum meira til trafala en nokkuð annað.

„Í mínu lífi er ég mjög virkur hér á Instagram og ef ég myndi hverfa á braut sporlaust í fimm vikur þá myndi það líklega kalla á fullt af spurningum og jafnvel eitthvað af sögusögnum, guð má vita hvert það leiðir. Þannig að ég er að deila þessu með ykkur hér einfaldlega til að hlífa mínu nánasta fólki frá óþarfa áreiti og ég vona að þið virðið það,“ segir Sigmar í myndbandinu sem hann deilir á samfélagsmiðlum.

„Mín neysla var búin að kalla á alls konar slæm samskipti og rangar ákvarðanir sem ég hef einfaldlega ekki pláss fyrir í mínu lífi lengur.“ Að lokum biður hann fólk um að virða friðhelgi einkalífsins.

„Þetta hef ég að segja og við sjáumst aftur á nýju ári.“  

Fréttin hefur verið uppfærð.