Viðskipti innlent

Gætu þurft að draga úr fram­leiðslu á Grundar­tanga

Árni Sæberg skrifar
Frá járnblendiverksmiðju Elkem á Grundartanga.
Frá járnblendiverksmiðju Elkem á Grundartanga. Vísir/Vilhelm

Elkem hefur tilkynnt að dregið verði úr framleiðslu í járnblendiverksmiðjum félagsins í Rana í Noregi og á Grundartanga. Forstjóri Elkem á Íslandi segir að í versta falli verði slökkt á einum þriggja ofna á Grundartanga í fimmtíu til sextíu daga. Hann voni þó að ekki þurfi að koma til þess. Þá verði engum sagt upp hjá félaginu.

Í fréttatilkynningu frá Elkem segir að ákveðið hafi verið draga úr framleiðslu á kísiljárni í Noregi og á Íslandi vegna erfiðra markaðsaðstæðna. Það geti leitt til tímabundinna uppsagna starfsfólks.

Álfheiður Ágústsdóttir, forstjóri Elkem á Íslandi, segir í samtali við Vísi að um skammtímastöðvanir framleiðslu sé að ræða til þess að draga úr magni kísiljárns á markaði. 

Markaðir hafi verið erfið til lengri tíma og mikil óvissa sé uppi um hvort Evrópusambandið muni setja verndartolla á kísiljárn og þá hvort Ísland og Noregur verði undanþegin þeim.

Hún segist vona að ekki þurfi að koma til samdráttar í framleiðslunni hér á landi en ef það gerist verði það um mánaðamót nóvember og desember. Þá yrði í mesta lagi slökkt á einum þriggja ofna verksmiðjunnar og það í fimmtíu til sextíu daga.

Engum starfsmanna yrði sagt upp störfum og framleiðslustöðvunin yrði nýtt til annarra verka á borð við fræðslu starfsmanna.

Hvalfjarðarsveit Skattar og tollar Evrópusambandið Stóriðja

Tengdar fréttir

Kísiltollar gætu vel endað fyrir gerðardómi

Lagaprófessor segir enn margt á huldu um verndartolla sem ESB hyggst beita á kísiljárn frá Noregi og Íslandi. Vel kunni að vera að málið endi fyrir gerðardómi. 

„Komið nóg af áföllum“

Fyrsti þingmaður Norðvesturkjördæmis segir nóg komið af áföllum fyrir atvinnulífið á Akranesi og biðlar til utanríkisráðherra að beita sér af fullum krafti gegn yfirvofandi verndartollum Evrópusambandsins. Ef úr tollunum verður sé það enn eitt reiðarslagið fyrir samfélagið. 



Mest lesið


Fleiri fréttir

Sjá meira


×

Mest lesið