„Við grípum augna­blikið og gerum það mjög vel“

„Við vorum svolítið á hælunum í fyrri hálfleik fannst mér, sérstaklega varnarlega. Þetta var allt voðalega þægilegt fyrir þá. Svo er kafli í byrjun seinni hálfleiks þar sem við herðum tökin og mér finnst við gera vel og fáum góð stopp og auðveldar körfur í kjölfarið sem er lykillinn að þessum sigri,“ sagði Jóhann Þór í viðtali eftir leik.

Grindavík stakk af undir lok þriðja leikhluta og í byrjun þess fjórða. Það lagði grunninn að sigri sem varð nokkuð þægilegur undir lokin.

„Við búum til gott bil sem þeir ná aldrei að brúa. Seinni hálfleikur mjög góður og frammistaðan þar til fyrirmyndar. Auðvitað koma þeir til baka og bíta aðeins í okkur í restina, óþarflega mikið kannski. Flottur sigur og frábær endir á geggjuðu kvöldi.“

Eins og áður segir var þetta fyrsti heimaleikur Grindvíkinga í Grindavík í tæplega tvö ár. Stemmningin var mjög góð á pöllunum og HS Orku-höllin troðfull.

„Við grípum augnablikið og gerum það mjög vel. Þetta var falleg stund og geggjað í alla staði. Mætingin var eins og þetta væri oddaleikur í undanúrslitum. Þetta var geggjað og þvílík stemmning, allur pakkinn bara. Gæti ekki verið betra.“

Arnór Tristan Helgason fékk svakalega byltu undir lok fyrri hálfleiks þegar hann lenti illa eftir glæsilega troðslu. Staðan eftir leik var hins vegar betri en á horfðist í upphafi.

„Hann bar sig vel en það er bara með þessi höfuðhögg, ef hann hefði fengið eitt í viðbót það hefði verið vont. Við viljum ekki taka neina sénsa, hann lenti illa á bakinu og stífnaði allur upp. Við vildum vera skynsamir, það er nóg af leikjum eftir og hann stóð sig frábærlega þessar mínútur sem hann spilaði. Hann verður klár á fimmtudaginn,“ en Grindvíkingar mæta ÍA á hinum heimavelli sínum í Smáranum í næstu umferð.

Grindavík er að mörgu leyti með svipaðan hóp og á síðustu leiktíð en Jordan Semple og Khalil Shabazz komu vel inn í sínum fyrsta leik með liðinu.

„Við búum að því að vera með góðan kjarna. Jordan Semple var mjög góður í dag og mér fannst Khalil stýra þessu vel. Við eigum eftir að verða betri en við erum á fínasta stað held ég,“ sagði Jóhann Þór að lokum.