Stefna á að hefja starf­semi á Möltu innan tíu vikna

Í gær var greint frá því á vef Innherja að kröfuhafar Fly Play hf. hefðu fengið bréf frá Ísafold Capital þar sem upplýst hefði verið um að félagið stæði í viðræðum fyrir þeirra hönd við stjórnendur Play og flugvélasala þess um yfirfærslu á samtals átta vélum yfir til Fly Play Europe, maltneska dótturfélags Play sem stofnað var fyrr á árinu.

Fjárfestar sem hefðu keypt í skuldabréfaútboði Play í ágúst hefðu fengið tryggingar á efndum á bréfunum af hálfu Play. Þar væri meðal annars um að ræða veð í öllu hlutafé dótturfélaga, Fly Play Europe, og Play Lithuania, ásamt veðum í öllum almennum fjárkröfum félagsins á hendur dótturfélögum.

Fjármögnun tryggð fyrir maltneskt flugrekstrarleyfi

Samkvæmt upplýsingum fréttastofu voru starfsmenn maltneska félagsins upplýstir um það á starfsmannafundi í dag, að unnið væri að því að færa átta þotur yfir til félagsins og tryggja þeim maltneskt flugrekstrarleyfi. Framundan væri gríðarleg pappírsvinna og stefnt væri að því að hefja rekstur aftur sem allra fyrst.

Á fundinum sagði Carmen Cuschieri, yfirmaður flugþjóna hjá Fly Play Europe, að rekstur gæti hafist á nýjan leik á næstu fimm dögum. Í tölvupósti sem sendur var til starfsmanna Fly Play Europe seinna í dag kom svo fram að málið væri töluvert flóknara, og það gæti tekið nokkrar vikur að hefja starfsemi aftur.

Í besta falli gæti það verið eftir 4 - 5 vikur, en öruggast væri að giska á að ferlið gæti tekið um 6 - 10 vikur.

Starfsmenn Fly Play Europe sem sátu fundinn voru margir hverjir strandaglópar á Moldóvu og mikil óvissa var uppi um það hvert ætti að flytja þá og hvenær það yrði gert. Það ylti á því hvernig gengi að greiða úr flóknum málum næstu daga.

Á fundinum fyrr í dag héldu íslenskir forsvarsmenn Play því fram að búið væri að tryggja fjármögnun fyrir mikilvæg atriði eins og maltneska flugrekstrarleyfið fyrir þoturnar.

„Margir vinir mínir á Íslandi voru að missa vinnuna sína, en ekki ég. Ég er einn af held ég tveimur sem eru ennþá með vinnu. Ég væri ekki núna að vinna fyrir Fly Play Europe, ef ég væri ekki viss um að það væri búið að tryggja fjármögnun fyrir verkefnið,“ sagði Halldór Guðfinnsson, stjórnandi hjá Play á fundinum.

Flestar vélar komnar til Toulouse

Í tölvupósti sem sendur var til starfsmanna Fly Play Europe kemur fram að ástandið sé flóknara en áður var talið, og ekki verði hægt að hefja rekstur á næstu dögum eins og haldið var í fyrstu. Flestar vélar Play séu nú staddar í Toulouse í Frakklandi.

„Þessi staður er aðallega notaður fyrir langtímageymslu, umfangsmiklar viðgerðir, eða þegar flugrekendur endurnýja samninga og færa vélar milli leiguaðila. Framundan er mikil endurskipulagning og við getum ekki búist við því að vélarnar verði komnar aftur til okkar á næstu dögum,“ segir í tölvupóstinum.

Framundan sé mikil vinna við að færa flugvélarnar til maltneska félagsins. Endurnýja þurfi leigusamninga við flugrekendur, og flugvélarnar þurfi að standast allar viðhaldsskoðanir á nýjan leik.

Að lokum þurfi að flytja vélarnar til Möltu, Mallorca og Sharm El Sheikh í Egyptalandi þaðan sem þær verða reknar, manna áhafnir vélanna og svo þurfi að tryggja maltneskt flugrekstrarleyfi.