Besta sætið: „Þetta er Martin sem við þekkjum“

Eftir þrjá erfiða leiki spilaði Martin einkar vel þegar Íslendingar lutu í lægra haldi fyrir Slóvenum, 79-87, í fjórða leik sínum í D-riðli á Evrópumótinu í gær. Martin skoraði 22 stig, tók fjögur fráköst og gaf sex stoðsendingar. Hann var næststigahæstur á vellinum á eftir ofurstjörnunni Luka Doncic.

„Þetta er Martin sem við þekkjum,“ sagði Benedikt í Besta sætinu, hlaðvarpi íþróttadeildar Sýnar, þar sem leikurinn gegn Slóveníu var gerður upp.

Martin hefur verið lykilmaður í íslenska landsliðinu í mörg ár og Benedikt segir að stuðningsmenn þess séu orðnir góðu vanir þegar kemur að framlagi frá bakverðinum knáa.

„Maður var orðinn svo ofdekraður af frammistöðum frá Martin að maður var eiginlega orðinn hissa þegar hann átti ekki toppleik, heldur bara fínan leik. Maður var farinn að taka því allt of mikið sem sjálfsögðum hlut,“ sagði Benedikt.

„En þetta er frammistaðan sem maður var að vonast eftir og hún kom heldur betur í dag [í gær], bæði þegar kom að því að skora og spila menn uppi.“

Martin hitti úr sjö af níu skotum sínum inni í teig gegn Slóveníu og tvö af fjórum þriggja stiga skotum hans rötuðu rétta leið. Þá nýtti hann bæði vítaskotin sín.

Fimmti og síðasti leikur Íslands á EM er gegn Frakklandi, silfurliði síðustu Ólympíuleika, á morgun. Íslendingar og Frakkar mættust á EM fyrir átta árum. Þar hafði franska liðið betur, 115-79. Martin skoraði þrettán stig í leiknum og var næststigahæstur í íslenska liðinu á eftir Jóni Arnóri Stefánssyni.

Hægt er að hlusta á Besta sætið í heild á tal.is eða í öðrum hlaðvarpsveitum, eða í spilaranum hér ofar í greininni.