Stoltur og þakk­látur með tárin í augunum

Hilmar þreytti frumraun sína á stórmóti í gær og biðin hefur verið mikil eftir þessu augnabliki. Hann segir það hafa verið einstakt að fá að spila á þessu sviði með yfir þúsund Íslendinga í stúkunni, þar á meðal fjölskyldu sína.

„Þetta var gjörsamlega sturlað. Það var ekkert rosalega langt í tárin þegar þjóðsöngurinn var kominn í gang og maður heyrði Íslendingana taka undir. Þetta er svo fallegt, að sjá alla þessa Íslendinga koma út og styðja við bakið á okkur,“

„Þetta er einstakt og við erum fáránlega þakklátir fyrir það. Við getum ekki beðið eftir því að gefa þeim sigur á þessu móti,“ segir Hilmar Smári.

Frábær frammistaða

Hilmar Smári sat á bekknum nánast allan leikinn en fékk tækifæri þegar öllu byrjunarliði Íslands var skipt af velli undir lokin. Seinustu mínútur voru svokallaður ruslatími þar sem ljóst var að Ísrael myndi vinna leikinn og mörgum skipt út af.

Hilmar var hins vegar nærri því að koma spennu í leikinn og stóð sig frábærlega þær mínútur sem hann spilaði. Munurinn varð að endingu tólf stig en hefði hæglega getað verið meiri ef Hilmars hefði ekki notið við. Hann kveðst hafa liðið vel á vellinum.

„Ég er reyni alltaf að vera eins stemmdur og tilbúinn og ég get og taka af skarið þegar tækifærið gefst. Ég fékk tækifærið undir lokin í gær og ég greip það og skaut nokkur skot. Ég hef gert það nokkrum sinnum og mun halda áfram að gera það. Það er ekki lýsandi fyrir mig að vera ragur eða hræddur. Ég veit að þeir treysta mér fyrir því að gera það sem ég geri vel,“ segir Hilmar.

En ertu ósáttur við að hafa ekki fengið tækifærið fyrr í leiknum?

„Nei, nei. Þetta er hlutverkið mitt eins og er. Það er væntanlega einhver ástæða fyrir því að ég kem ekki inn á. Þjálfararnir, Baldur, Craig og Viðar, ég hef fulla trú á þeim. Ef ég er best geymdur á bekknum í einhverjum leikjum, þá er það bara þannig, ég treysti því fullkomnlega. Ef það eru not fyrir mig í öðrum leik þá treysti ég því líka. Þeir trúa á mig sem leikmann og þegar ég kem inn á er einhver ástæða fyrir því. Auðvitað vill maður spila meira en við viljum líka vinna og ef þetta er leiðin til að vinna styð ég það.“