Ný verslun nærri þúsund fer­metrum stærri en sú gamla

Í tilkynningu kemur einnig fram að Tokyo Sushi verði með útibú í versluninni og að nýjung innan Skannað og skundað verður kynnt í versluninni þar sem viðskiptavinir munu geta leitað að vöru í appi Krónunnar og séð hvar hún er staðsett í versluninni. 

„Verðmerking vörunnar blikkar þegar notandinn nálgast hana og sparast því mikill tími í leit að réttri vöru. Að auki er verslunin opin frá klukkan 8 á morgnana til 21 á kvöldin til að gera sem flestum kleift að versla í matinn á tíma sem hentar,“ segir í tilkynningunni.

Í byggingu í tvö ár

Guðrún Aðalsteinsdóttir, framkvæmdastjóri Krónunnar, er ánægð með opnun verslunarinnar. Fyrsta skóflustungan að húsnæðinu var tekin fyrir um tveimur árum og var frá byrjun lagt upp með að hanna verslunina með áherslu á gott flæði og rúma ganga, til að tryggja sem besta upplifun viðskiptavina.

„Við sjáum gríðarleg tækifæri til framtíðar hér á Suðurnesjum og erum afar þakklát fyrir það traust sem íbúar svæðisins hafa sýnt okkur í gegnum árin. Við höfum fengið ótrúlega góðar móttökur bæði í verslun okkar og einnig hvað varðar heimsendingarþjónustuna okkar. Nú getum við, með stærri og þægilegri verslun, veitt enn hraðari, skilvirkari og betri þjónustu. Við leggjum jafnframt áherslu á ferskleika, hagstætt verð og fjölbreytt vöruúrval og hlökkum mikið til að bjóða íbúa Suðurnesja velkomna í nýju verslunina okkar,“ segir Guðrún.

Úr 1.350 fermetra verslunarrými í tæpa 2.400 fermetra

Jón Þór Kristinsson, verslunarstjóri Krónunnar við Fitjabraut er spenntur að flytja í nýtt og stærra húsnæði sem er um þúsund fermetrum stærra en fyrra rými. Í tilkynningu segir að með stækkuninni sé hægt að mæta aukinni eftirspurn eftir heimsendingarþjónustu á svæðinu.

„Okkur hefur lengi dreymt um að komast í stærra húsnæði svo að vel fari um bæði viðskiptavini og starfsfólk. Viðskiptavinir okkar hafa beðið spenntir eftir opnun og það sama má segja um starfsfólkið okkar sem hefur síðustu daga unnið hörðum höndum að því að fylla á nýjar hillur og kæla. Við hlökkum því mikið til að hitta viðskiptavini okkar á ný í stærstu og glæsilegustu matvöruverslun Suðurnesja.“

Svansvottuð og vatnkrani til að fylla á vatn

Verslunin er Svansvottuð líkt og allar verslanir Krónunnar og verður rýmið upphitað með nýjum geislahiturum sem eru bæði umhverfisvænir og sparsamir á vatn. í tilkynningu segir að einnig verði orkusparandi LED lýsing um alla verslun, auk þess sem umhverfisvænt CO2 kerfi muni keyra lokaða kæla og frysta. Þá segir að þyrstir viðskiptavinir muni geta fyllt á ferskt vatn í fjölnota brúsa við Krónukranann sem staðsettur verði í anddyri verslunarinnar.