Brotnaði saman þegar hann bar liðsfélögum tíðindin

„Það var tilfinningarússibani í gær. Það er leiðinlegt að geta ekki klárað verkefnið og farið með þeim út og upplifað þetta aftur,“ segir Helgi um tilfinningarnar sem bærðust innra með honum í gær.

„Það var reiði, svekkelsi og maður tók þetta allt saman. Maður féll í grát og þetta var mikið högg. Maður er búinn að vera með þeim allt sumarið og koma sér á þann stað að geta hjálpað. Svo kemur eitt högg og maður er bara út.“

Brákaður á barka og blæðing inn á raddböndin

Haukur Helgi var í lokahópi Íslands fyrir EM sem tilkynntur var á þriðjudag, en skyndilega í gær, rúmum sólarhring síðar opinberaði KKÍ að hann færi ekki með. Haukur hafði meiðst í barka í leik við Portúgal fyrir viku síðan en alvarleiki meiðslanna kom ekki í ljós fyrr en í gær.

„Mér er sagt að kíkja til læknis vegna þess að ég er enn hás eftir höggið, og sem betur fer. Þar er mér tilkynnt að það þurfi að spegla mig og sjá hvort allt sé í góðu. Í ljós kemur að það er blæðing inni á raddböndunum og brot í brjóskinu á barkanum. Hann færðist eitthvað til. Svo ég þarf að fara í aðgerð á þriðjudaginn að láta setja þetta saman,“ segir Haukur Helgi.

Haukur er verkjaður en kláraði leikinn við Portúgal og æfði tvisvar með liðinu eftir meiðslin og fann ekkert sérlega mikið fyrir meiðslunum. Það hefði hins vegar verið hættulegt fyrir hann að fara á mótið í þessu ástandi.

„Það er engin mótstaða þarna núna svo ef það kæmi annað högg þá hefði getað blætt ennþá meira og þrengt að öndurvegi og farið töluvert verr. Maður er þakklátur fyrir að það fór ekki þannig en á sama tíma er maður ungur í anda og íþróttamaður. Mig langar bara að fara að keppa og vera með strákunum,“

Tilfinningarnar tóku yfir

Fregnirnar eru honum eðlilega mikið áfall. Hvað erfiðast var að segja liðsfélögunum að hann færi ekki með þeim út.

„Þetta var erfitt. Þetta var mikið högg á sálina og hausinn. Að þetta hefði gerst og þetta væru tíðindin. Ég bjóst ekki við því. Þetta var erfitt, ég get alveg sagt það. Svo reyndi maður að segja strákunum frá þessu, en það var eiginlega bara ekki hægt. Maður fór bara að gráta og tilfinningarnar tóku yfir,“

„Andlega var maður kominn á þann stað að fara á stórmót. Það var mikil tilhlökkun og þetta er það sem allir vilja gera, að fara á þessi mót, þetta er það skemmtilegasta sem maður gerir, með landsliðinu. Að fá að upplifa þetta með fólkinu sínu og krökkunum. Það er hellingur sem spilar inn í þetta. Þetta er högg,“ segir Haukur Helgi.

„Ég held að Ægir hafi séð það á mér að ég væri að fara að koma með leiðinlegar fréttir. Það gerði eiginlega útslagið. Ég held ég hafi bara náð að segja að ég væri brotinn í barkanum og hafi svo ekkert sagt meira. Það voru bara faðmlög. Þetta var sorgarstund en falleg stund. En ég ætla að reyna að fara út og gera eitthvað, leggja mitt að mörkum, þó það sé utan vallar,“ segir Haukur Helgi, sem fer í aðgerð á þriðjudag og stefnir út til liðs við hópinn í kjölfarið, þó ljóst sé að hann taki engan þátt innan vallar á mótinu.

„Ég stefni á að fara út á föstudeginum, ég myndi missa af fyrsta leik. Mig langar að fara út og ég veit að þeir vilja fá mig út og þjálfararnir. Það er verið að gera allt til þess að það sé möguleiki, að ég verði með þarna á bekknum og miðli reynslu eða hvað sem er. Að vera partur af þessu og hjálpa þeim í gegnum þetta,“ segir Haukur Helgi.

Viðtalið við Hauk Helga í heild má sjá að neðan.