Verðlagssæti Ís­lands enn eitt árið komi ekki á ó­vart

Það er aðeins í Sviss sem verð á almennum neysluvörum var hærra en á Íslandi í fyrra samkvæmt útttekt Eurostat hagstofu Evrópusambandsins en verðlag á Íslandi var 62 prósentum hærra á síðasta ári en að jafnaði í ríkjum Evrópu. Þá var verðlag á mat og drykk 44 prósentum hærra á Íslandi en í Evrópusambandinu. Samanburðurinn náði til 36 ríkja, 27 ríkja Evrópusambandsins, þriggja EFTA ríkja og þriggja umsóknarríkja að Evrópusambandinu. Breki Karlsson formaður Neytendasamtakanna segir tölurnar ekki koma á óvart.

„Þetta kemur því miður ekki á óvart, við höfum verið að keppast um efstu þrjú sætin á þessum lista í áraraðir við Noreg og Sviss og höfum skipst á að verma sæti eitt, tvö og þrjú í þessum efnum. Þannig þetta eru því miður engar nýjar fréttir og kemur því miður ekki á óvart. Að sjálfsögðu þurfum við að berjast fyrir því að fara neðar á þessum lista og að verðlag hér verði skikkanlegt.“

Um sé að ræða eitt stærsta hagsmunamál íslenskra neytenda. „Það er erfitt kannski að benda á einhvern einn sökudólg í þessu. Kaupmáttur á Íslandi er frekar hár, launin halda þó ekki, við erum að keppa um efstu þrjú sætin í verði en því miður erum við ekki á sama stað hvað varðar laun, þar erum við neðar á lista og þar þyrfti að koma eitthvað samræmi á.“

Ýmislegt þurfi að koma til eigi að ná niður verðlagi á Íslandi. „Við eigum að ýta undir samkeppni, breyta stuðningi við bændur í styðjandi stuðning en ekki hamlandi stuðning eins og hann er núna. Við þurfum að efla samkeppni hvar sem við getum en ekki hamla henni eins og hefur verið gert að undanförnu. Það er ýmislegt, ekki eitt en ýmislegt sem þarf að gera.“