Sig­rún Ósk ráðin upp­lýsinga­full­trúi Akraneskaupstaðar

Sigrún Ósk hefur víðtæka reynslu úr fjölmiðlum sem blaðamaður, ritstjóri og dagskrárgerð en þar af starfaði hún í sextán ár hjá Stöð 2. Til að mynda sá hún um geysivinsælu þættina Leitin að upprunanum, Allir geta dansað og Idol. Hún ákvað að hætta þar í byrjun árs.

Sigrún Ósk er með BA-próf í heimspeki, hagfræði og stjórnmálafræði frá Háskólanum á Bifröst. Hún hefur störf fyrir kaupstaðinn í ágúst en hefur áður gegnt starfi markaðs- og atvinnufulltrúa hjá Akraneskaupstað og verið varamaður í bæjarstjórn.

„Ég er afar þakklát fyrir að hafa verið treyst fyrir því mikilvæga verkefni að móta nýtt starf upplýsingafulltrúa hjá Akraneskaupstað og er full tilhlökkunar að hefja störf. Mér hefur alla tíð þótt mjög vænt um þetta góða bæjarfélag og er spennt fyrir að leggja mín lóð á vogarskálarnar," er haft eftir Sigrúnu Ósk.

„Upplýsingafulltrúi gegnir lykilhlutverki í að tryggja skýra, faglega og gagnsæja upplýsingagjöf til íbúa, fjölmiðla og annarra hagsmunaaðila. Með ráðningu Sigrúnar Óskar styrkir Akraneskaupstaður enn frekar upplýsingamiðlun sína og eykur aðgengi að upplýsingum um starfsemi og stefnumál sveitarfélagsins,“ segir í tilkynningu á vefsíðu Akraneskaupstaðar.

Alls barst 31 umsókn um starfið en meðal verkefna starfsins er umsjón með samfélagsmiðlum Akraneskaupstaðar og útgáfa fréttatilkynninga.