Í stöðugu sam­bandi við strandaglópinn Solomon

Solomon gekk í raðir Spurs frá Shakhtar Donetsk árið 2023, en lék aðeins sex leiki fyrir félagið áður en slæm meiðsli sáu til þess að tímabilinu var lokið hjá Ísraelanum.

Þessi 25 ára gamli leikmaður var staddur í heimalandi sínu, Ísrael, í síðustu viku þar sem hann gekk í það heilaga með unnustu sinni, Dana Voshina, síðastliðinn fimmtudag.

Solomon og Voshina hafa hins vegar ekki getað yfirgefið landið eftir að ísraelski herinn lokaði fyrir almenna flugumferð yfir landinu í kjölfar loftárása Írana á landið í síðustu viku.

„Við erum í stöðugu sambandi við alla okkar leikmenn varðandi vellíðan og velferð þeirra,“ sagði talsmaður Spurs.

Solomon skoraði tíu mörk í 39 leikjum fyrir Leeds á síðasta tímabili, þar sem hann lék á láni. Þá á hann að baki 44 leiki fyrir ísraelska landsliðið.