„Svo bakkarðu upp að línu og þenur drusluna“

Síðustu daga hefur verið stappað á Akureyri enda eru Bíladagar stór viðburður og margir leggja leið sína þangað.

Jónas Freyr Sigurjónsson, einn af aðstandendum Bíladaga, segir að hátíðin hafi gengið rosalega vel.

„Við erum búnir að halda sandspyrnu, götuspyrnu og bílalimbó í gær. Erum að klára rallíkrosskeppni hérna og allt hefur gengið samkvæmt kúnstarinnar reglum,“ segir hann.

Það er sunnudagur en þessu er ekki lokið?

Nei þessu er alls ekki lokið, á morgun er hérna drift, og annað kvöld er svo eldsprengingin okkar þar sem við höldum burnout keppni, og þar er alltaf marg um manninn og ægilegt fjör.“

Hávaðakeppnin, hvernig fer hún fram?

Hávaðakeppnin fer semsagt þannig fram að þú kemur á bílnum þínum og þú ert með ónýtt púst eða álíka, eða á snjósleða eða mótorhjóli. Svo bakkar þú upp að línu og þenur drusluna þína þannig að allur hávaðinn kemur fram.“

„Svo eru áhorfendur sem dæma hvor hafði meiri hávaða og þá kemstu í næstu umferð og á endanum sitjum við uppi með sigurvegara sem hafði mestan hávaða.“