Ótrú­leg endur­koma og allt jafnt í úr­slita­ein­víginu

Til þessa í úrslitakeppninni hefur það verið Pacers sem hefur ítrekað komið til baka í 4. leikhluta allt virtist glatað. Í nótt breyttist það hins vegar þar sem Tyrese Haliburton og félagar voru fjórum stigum yfir þegar þrjár mínútur og 20 sekúndur voru til leiksloka.

Fjögur stig vissulega ekki neitt í körfubolta en Pacers höfðu verið hænuskrefi framar nær allan leikinn og með sigri hefðu þeir komist í 3-1. Aðeins eitt lið hefur komið til baka í sögu úrslita NBA-deildarinnar eftir að lenda 3-1 undir. 

Leikur næturinnar var hin mesta skemmtun og gríðarlega spennandi allt frá upphafi til enda. Segja má að ótrúlegur endasprettur Shai Gilgeous-Alexander hafi séð til þess að staðan í einvíginu sé nú jöfn. Ekki nóg með að hann hafi skorað 15 af 35 stigum sínum í 4. leikhluta heldur skoraði hann 15 af 16 síðustu stigum OKC í leiknum. Ofan á það tók hann þrjú fráköst.

Shai var líkt og vanalega stigahæstur í liði OKC en Jalen Williams var ekki langt undan með 27 stig ásamt því að taka sjö fráköst og gefa þrjár stoðsendingar. Alex Caruso skoraði 20 stig og tók þrjú fráköst. Chet Holmgren skoraði svo 14 stig en reif niður 15 fráköst og gaf eina stoðsendingu. 

Í liði Pacers var Pascal Siakam stigahæstur með 20 stig ásamt því að taka átta fráköst og gefa fimm stoðsendingar. Haliburton skoraði 18 stig, gaf fimm stoðsendingar og tók tvö fráköst. Obi Toppin skoraði 17 stig, tók fimm fráköst og gaf eina stoðsendingu. Myles Turner skoraði þá 12 stig, tók tvö fráköst og gaf tvær stoðsendingar. 

Næsti leikur liðanna fer fram aðfaranótt 17. júní og verður í beinni útsendingu Sýnar Sport 2. Hér að neðan má sjá lokasókn leiksins í nótt, viðtal við Shai eftir leik og umræður sérfræðinga Sýnar Sport.