Kvika segir hvorugt til­boð nægi­lega gott

Í tilkynningu Kviku til Kauphallar segir að bankinn vísi til tilkynninga frá 27. og 28. maí síðastliðnum, þar sem fram kom að Arion banki hf. annars vegar og Íslandsbanki hf. hins vegar hefðu óskað eftir viðræðum um mögulegan samruna við Kviku.

„Að vel skoðuðu máli er það mat stjórnar Kviku að hvorki erindi Arion banka hf. né Íslandsbanka hf., sem bárust þann 27. og 28. maí sl., endurspegli virði Kviku. Stjórn Kviku telur því ekki forsendur fyrir því að hefja samrunaviðræður á grundvelli framangreindra erinda,“ segir í tilkynningunni.

Engu að síður sé það mat stjórnar Kviku að umtalsverð tækifæri og verðmæti geti falist í sameinuðum félögum fyrir bæði hluthafa og viðskiptavini. Séu aðilar tilbúnir að endurskoða þær forsendur um virði Kviku sem fram komu í framangreindum erindum, sé stjórn Kviku reiðubúin að endurmeta ákvörðun sína varðandi samrunaviðræður. 

Erindum Arion banka hf. og Íslandsbanka hf. hafi verið svarað á þann veg sem hér að framan greinir.