Enn færri komast að í HR en vilja

Í tilkynningu frá HR segir að í ár, líkt og fyrri ár, komist færri að en vilja í nám í HR þar sem rúmlega helmingur þeirra sem sækir um, eða um 1.500 nýnemar, verði teknir inn í nám í haust.

„Umsóknarfrestur um grunnnám rann út fimmtudaginn 5. júní og umsóknarfrestur um meistaranám rann út 30. apríl en opið er fyrir umsóknir um nám í Háskólagrunni til 18. júní. Því eru líkur á að heildartala umsókna hækki enn.  

Athygli vekur að í ár sækja fleiri konur um nám í HR heldur en karlar. Hlutfallið er rúmlega 51% konum í vil en síðustu ár hafa karlar verið í meirihluta umsækjenda og það sama hefur verið uppi á teningnum varðandi kynjahlutföll brautskráðra. Fleiri karlar hafa í gegnum tíðina útskrifast úr grunnnámi.

Flestar umsóknir bárust um nám við viðskipta- og hagfræðideild og næstflestar umsóknir bárust um nám við verkfræðideild. Þá fjölgaði umsóknum um nám við lagadeild um 15% á milli ára,“ segir í tilkynningunni.