Fundaði með borginni: „Hef upp­lifað ýmis­legt en aldrei svona grimmd“

Fjallað hefur verið um afdrif körfuboltafélagsins Aþenu undanfarna daga, en rekstrarsamningur félagsins við borgina um notkun íþróttahúsnæðis rann út þann 31. maí. Í Facebook færslu þann dag sagði Brynjar ekkert benda til þess að borgin vilji endurnýja samninginn og tíminn til að skipuleggja starfið fyrir næsta vetur væri á þrotum. Að óbreyttu yrði félagið lagt niður í lok vikunnar. 

Fátt um svör hvers vegna

Vongóður fundaði Brynjar ásamt öðrum fulltrúum Aþenu með Skúla Helgasyni, formanni íþrótta- og menningarráðs Reykjavíkurborgar, og Steinþóri Einarssyni, sviðsstjóra menningar- og íþróttasviðs Reykjavíkurborgar, í dag. 

Á Facebook greinir hann frá því að á fundinum hafi meðal annars komið fram að borgin muni ekki endurnýja samning við Aþenu undir nafni félagsins. Þá hafi félaginu aðeins verið boðinn afmarkaður aðgangur að tímum í húsnæðinu en ekki lyklavöld eða full stjórn á húsinu í samvinnu við Leikni.

Í samtali við fréttastofu segir Brynjar að vegna þessa sé staðan enn óbreytt, félagið verði lagt niður í lok vikunnar ef fram heldur sem horfir. Hann segist í áfalli eftir fundinn, hvar hann segist hafa fengið lítið um svör.  

„Það sem kom mest á óvart er að við fáum engin svör við því hvað það er sem þau eru ekki sátt við,“ segir Brynjar. „Það komu engin svör. Var ég leiðinlegur eða?“

„Það sjá þetta allir, árangurinn er ekki þokkalegur heldur frábær. Hann væri mjög góður ef þetta væri uppbygging í öllum öðrum hverfum. Þarna erum við að tala um árangur í mesta olnbogabarni ekki bara borgarinnar heldur Íslandi. Það sem er búið að hafa fyrir þessu er jarðað í þvílíkum hroka, pólitík og vanvirðingu.“

Sviðsstjóri ekki þegið heimboð

Brynjar segir einnig koma sér á óvart að borgaryfirvöld hafi ekki gefið upp neinar aðrar mögulegar áætlanir um framtíð félagsins. 

„Borgin vill bara fá að vera með allt niður um sig í málefnum Breiðholtsins í friði. Þau geta þóst vera að starta hverju verkefninu á fætur öðru með engum árangri og jaðarsetja hópinn ennþá meira og þykjast svo ætla að bjarga honum með reglulegu millibili.“

Þá segist Brynjar hafi boðið Skúla Helgasyni formanni íþrótta- og menningarráðs í heimsókn í húsakynni Leiknis til að kynna sér starfsemi félagsins síðustu átta vikur en hann ekki þegið boðið, sem Brynjar segir fáránlegt. 

„Við erum styrktaraðilar borgarinnar á svo margan hátt. Það eru gríðarlegir fjármunir sem fara í þetta og svo vinnan sem er einhverju epísku leveli. Stelpurnar í meistaraflokki eru allar að þjálfa. Þetta er klúbbur sem hefur aldrei átt sinn líka og við getum ekki einu sinni boðið þeim að koma í heimsókn.“

Aðspurður segist Brynjar sem fyrr ekki sjá neina aðra lausn, nema einhver grípi boltann, en að félagið verði lagt niður í lok vikunnar. 

„Breiðholtið á enga rödd. Þetta er raddlausasta póstnúmer á landinu. Og þeir ætla bara að berja niður rödd hverfisins sem er rétt að kvikna.“