Minnsta fylgi Fram­sóknar í 33 ára sögu þjóðarpúlsins

Ríkisútvarpið greinir frá niðurstöðunum, en í fréttinni kemur fram að Samfylkingin hafi ekki mælst með meira fylgi frá kosningum. Flokkurinn hafi síðast í mars í fyrra mælst yfir þrjátíu prósentum. 

Miðflokkurinn skákar Flokki fólksins

Þá segir að fylgi annarra flokka hreyfist lítillega milli mánaða. Sjálfstæðisflokkurinn mælist með 21,7 prósenta fylgi en Viðreisn með 14,4 prósent. Miðflokkurinn mælist með 9,1 prósenta fylgi og Flokkur fólksins 7,5 prósent. 

Sem fyrr segir mælist Framsóknarflokkurinn með 5,5 prósenta fylgi og hefur samkvæmt umfjöllun RÚV ekki mælst minna síðan þjóðarpúlsinn hóf göngu sína árið 1992. Flokkurinn hlaut 7,8 prósent atkvæða í Alþingiskosningunum í nóvember og fylgi hans mældist 6,1 prósent í síðasta mánuði. 

Vinstri græn mælast með 3,6 prósenta fylgi, sem er lítilleg bæting milli mánaða. Þá mælast Píratar enn með 3,3 prósent.

Fylgi Sósíalista flokksins minnkar mest allra milli mánaða, fer úr 4,7 prósentum í 3,5 prósent. Á ýmsu hefur gengið hjá flokknum eftir að ný forysta hans var kjörin á aðalfundi hans fyrir skemmstu. 

Samanlagt mælast ríkisstjórnarflokkarnir með 53 prósenta fylgi, sem er aukning frá síðasta mánuði, þegar fylgið mældist 51 prósent. Aftur á móti segjast um 67 prósent styðja ríkisstjórnina. 

Könnunin var gerð dagana 1. maí til 1. júní 2025. Heildarúrtak var 11.521 og þátttökuhlutfall 44,9%. Einstaklingar voru valdir til þátttöku af handahófi úr viðhorfahópi Gallups.