Íslenski boltinn

„Þetta mark átti ekki að telja“

Ágúst Orri Arnarson skrifar
Sölvi Geir segir þriðja mark Breiðabliks ekki hafa átt að telja, heilt yfir hafi Víkingur ekki átt sigur skilið. 
Sölvi Geir segir þriðja mark Breiðabliks ekki hafa átt að telja, heilt yfir hafi Víkingur ekki átt sigur skilið.  vísir / diego

Sölvi Geir Ottesen, þjálfari Víkings, er sannfærður um að þriðja markið í 3-1 tapi liðsins gegn Breiðabliks hefði ekki átt að standa. Bæði hafi Tobias Thomsen verið rangstæður og brotið af sér.

„Hann klárlega hrindir í bakið á [Gunnari Vatnhamar], þannig að það er bara aukaspyrna… Þegar boltanum er spyrnt, þá var [Tobias] rangstæður. Þannig að þetta mark átti ekki að telja“ sagði Sölvi í viðtali eftir leik.

Markið sem Sölvi vill meina að hefði ekki átt að standa má sjá í spilaranum hér fyrir neðan. 

Klippa: Þriðja mark Breiðabliks

Breiðablik komst þannig 3-0 yfir snemma í seinni hálfleik, þriðja markið margrómaða gerir yfirleitt út af við leiki og gerði það í þessum líka.

„Gerir allavega mun erfiðara fyrir okkur að koma til baka, þannig að það er svekkjandi að svona mark fái að standa. En yfirhöfuð í leiknum vorum við ekki nógu grimmir, sóknarleikurinn ekki nógu djarfur, ekki nógu hugrakkir til að spila í svæðin…

Við gerðum það oft á köflum og þá opnaðist vörnin þeirra en þá bara nýttum við það ekki. Stundum gerist það að þú ert ekki á þínum degi og við vorum ekki á okkar degi í dag.“

Víkingar fara nú í tveggja vikna landsleikjahlé, með eins stigs forskot á toppnum í stað sjö stiga forskots sem hefði náðst með sigri. Sölvi er alls ekki ósáttur með stöðuna.

„Það er svosem engin krísa eða heimsendir, við erum ennþá á toppnum og yfir heildina er ég mjög sáttur við frammistöðu liðsins.

Við komum inn í þetta tímabil á mjög skrítinn hátt. Vorum í Sambandsdeildinni og áttum langt tímabil. Mikið um meiðsli í byrjun móts. Vantaði líka Oliver Ekroth í dag. Ég er mjög stoltur af strákunum, hvað þeir hafa gert fram að þessu og það þýðir ekkert að vorkenna sér of mikið núna. Lærum af þessum, höldum áfram að bæta okkur og ná markmiðum okkar“ sagði Sölvi að lokum.




Fleiri fréttir

Sjá meira


×