Ís­lensk fyrir­tæki geti endurheimt veru­legar fjár­hæðir

Hópmálsóknin byggir á dómi Evrópudómstólsins frá því í fyrra um að svokallaðir verðjöfnunarskilmálar fyrirtækisins hafi brotið gegn samkeppnislögum Evrópusambandsins. Á tuttugu ára tímabili frá 2004 til 2024 hafi Booking.com notað samkeppnishamlandi skilmála sem settu íslensk hótel „í óhagstæða samkeppnisstöðu og ollu rekstraraðilum verulegu fjárhagslegu tjóni,“ að því er segir í tilkynningu frá Samtökum ferðaþjónustunnar.

„Þessir skilmálar voru í september síðastliðnum dæmdir ólöglegir af Evrópudómstólnum og þar með hefur myndast réttur til þess að gera kröfu um skaðabætur vegna þessa,“ segir Jóhannes Þór.

Mikið í húfi fyrir íslensk fyrirtæki

„Það sem er í húfi fyrir íslensk fyrirtæki þarna er í rauninni að endurheimta verulegar fjárhæðir frá fyrirtækinu vegna þess að þóknanir þess hafa verið of háar miðað við þessa ólöglegu skilmála á þessu tímabili. Og ekki síður að sýna það og taka þátt í þeirri samstöðu sem að felst í því að evrópsk fyrirtæki á gistimarkaði skuli taka sig saman og standa saman og sýna svona markaðsráðandi aðilum að þau geti staðið saman um að sækja bætur þegar að svona ólöglegum skilmálum er beitt,“ segir Jóhannes.

Hann hvetur fyrirtæki í hótel- og gistiþjónustu á Íslandi til að kynna sér málið á vef samtakanna og „skrái sig sem flest til leiks og taki þátt í þessari málsókn.“

Hann kveðst ekki hafa upplýsingar að svo stöddu um það hve mörg fyrirtæki á Íslandi hafi meldað sig til þátttöku í hópmálssókninni. „Þetta fór í loftið, skráningarsíðan, bara á miðvikudaginn og við vorum að setja út í gær upplýsingar á íslensku um þetta. En ég geri ráð fyrir því að það verði þónokkur íslensk fyrirtæki sem vilja taka þátt í þessu. Við hvetjum öll íslensk fyrirtæki sem að uppfylla þessi skilyrði, þessi einföldu skilyrði að vera hótel sem hefur verið í viðskiptum við Booking á þessu tímabili, að kynna sér upplýsingarnar og taka þátt.“