Veittu verð­laun fyrir dónalegasta orðið á Íslandsmeistaramóti í skrafli

Tíu umferðir voru spilaðar að skrafli og en Garðar Guðnason bar loks sigur úr býtum. Þá kom það tvisvar fyrir í keppninni að skraflspilari náði að leggja niður svokallaðan nífaldara og fengu 185 stig fyrir eitt orð.

Einnig voru veitt verðlaun fyrir dónalegasta orðið. Þau verðlaun hlaut Hrafnhildur Þórólfsdóttir fyrir orðið graðasti.

„Lagnir voru véfengdar sem aldrei fyrr og fékk dómari ekki flóafrið,“ stendur í fréttatilkynningu frá Skraflfélagi Íslands en oft var kallað í dómarann til að dæma um hvort að orðin sem andstæðingurinn lagði niður væru í til í raun.

Meðal orða sem að dómarinn samþykkti ekki voru fótavani, klofráðs, sætíð, maðkastu og rumsi. Þá voru nokkur orð sem að dæmd voru gild líkt og nikkaðu, ógramur, ólaghenta og trums.