Ef þú finn­ur fyr­ir ein­kenn­um, hlust­aðu á lík­am­ann

„Þetta byrjaði þannig að ég var með slitinn liðþófa,“ segir Guðrún Ólöf Gunnarsdóttir, sem greindist með æxli á stærð við golfkúlu í hnénu í aðdraganda aðgerðar. Í eftirskoðun í september sáust engin ummerki um meinvörp, en um áramótin fann Guðrún Ólöf að eitthvað var ekki eins og það átti að vera. „Þá er ég farin að finna fyrir verkjum í baki, mjóbaki, mjöðm, nára og tám.“

Guðrún Ólöf fór til læknis í júní og fékk þá þær fréttir að krabbameinið væri búið að dreifa sér um fótinn. „Ég hlustaði ekki á líkamann og fór aðeins of seint,“ segir hún. Í kjölfarið þurfti hún að fara í aflimun og var fóturinn tekinn af fyrir ofan hné.

Finnur eitthvað jákvætt á hverjum einasta degi

Eftir aðgerðina tileinkaði hún sér að taka einn dag í einu og reyndi að hafa eitthvað fyrir stafni á hverjum degi. „Að finna alltaf eitthvað jákvætt.“ Hún vill einnig hvetja fólk til að hlusta á líkamann. „Ef þú finnur fyrir einkennum, hlustaðu á líkamann, ekki hunsa það. Alveg sama hversu lítið eða mikið, hlustaðu á líkamann.“