Ráða­menn hneykslast á Exit-auglýsingu SFS

Í auglýsingunni sem um ræðir sitja tveir snyrtilega klæddir Norðmenn að snæðingi á veitingahúsi þegar annar þeirra sýnir leifarnar af fiski sem hann hafði verið að borða og segir: „Veistu hvað? Þetta hér er gullnáma.“

Í kjölfarið þylur hann upp allt það sem hægt að búa til úr fiskiroði, beinum og öðru sem fellur til við fiskverkun.

Hinn svarar því svo til að Íslendingar framleiði þegar verðmæti úr þessu í stórum stíl.

„Þau gera húðkrem, sárabindi fyrir ameríska herinn ... En nú ætla þau að taka upp norska kerfið,“ segir hann, og hvorugur þeirra botnar í því hvers vegna Íslendingar skyldu vilja gera það.

Það sem vekur athygli margra er að annar leikarinn í myndbandinu er Jon Øigarden, sem margir kannast við úr norsku þáttunum Exit, sem fjölluðu um fjóra menn í fjármalaheimi Noregs.

Auglýsingin fjarri sambandi við jörðu

Þorbjörg Sigríður Gunnlaugsdóttir dómsmálaráðherra er meðal þeirra sem hafa kvatt sér hljóðs um málið en hún segir að frumvarp ríkisstjórnarinnar um veiðigjöld sé eðlileg og réttlát aðgerð. Öll þjóðin sjái það.

„Viðbrögð Samtaka fyrirtækja í sjávarútvegi eru töluvert fjarri sambandi við jörðu. Norsku Exit-leikararnir sem tala um að hér megi græða peninga speglar það fyrst og fremst.“

Kveðst hún stolt af þessu máli og segir Viðreisn standa heilshugar að baki þessu máli.

Listræn táknmynd firringar

Jón Gnarr þingmaður Viðreisnar skrifaði langa færslu um auglýsinguna á Facebook síðu sína þar sem hann sagði að auglýsingar nái stundum að verða listrænar táknmyndir fyrir dekadent firringu í samfélaginu.

„Auglýsingin er mjög fagmannlega gerð. Handritið er að vísu ekki gott en auglýsingin skartar útlenskum leikara, Jon Øigarden, sem svo kaldhæðnislega vill til að lék einn af fégráðugu drullusokkunum í Norsku þáttunum Exit.“

Segir hann svo að auglýsingin sé fyrirsláttur og leikaraskapur sem njóti engrar meðaumkunar hjá þjóðinni.

Kvikmyndagerðarmaðurinn Ragnar Bragason sagði auglýsinguna skelfilega, og sagði SFS eyða hundruðum milljóna í auglýsingaherferð og áróður fyrir málstað sem enginn nema frændi þeirra hafi samúð með.

Vilji ekki ræða málið efnislega

Egill Helgason, dagskrárgerðarmaður hjá Ríkissjónvarpinu, deildi hugleiðingum Ragnars á Facebook sinni.

„Algjörlega óskiljanleg auglýsing,“ hafði hann um málið að segja.

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, skrifaði svo athugasemd við færslu Egils. Hún segir einkennilegt að Egill og fleiri fjasi yfir formi en ekki efni.

„Hvernig væri að ræða efni málsins, norsku leiðina sem ráðherra vill fara? Minni verðmætasköpun, minni nýsköpun, hráefni flutt til Póllands óunnið, ósjálfbærar fiskvinnslur í Noregi o.s.frv.?“

Athugasemd ritstjónar: Heiðrún Lind er stjórnarkona í Sýn.